City-ah Australian midfielder Caceres

Manchester City chuan Australian mid-fielder Anthony Caceres chu Australian A League club Central Coast Ma-riners aṭangin an la lut. Kum 23-a upa central midfielder man zat hi tarlan ni lo mah se pound 15,0000 vel nia ngaih a ni.

Caceres hian kum 2012 khan Mariners hi zawmin league match 62 a khelhah goal thum a khung a, Australian League-ah player langsar ber pawl a ni. City hian Caceres hi Melbourne City lamah loan-in an chhuahtir lehnghal a, A League club Melbourne hi Manchester City neitute ta tho a ni.

Mariners head coach Tony Walmsley chuan, "Mariners tana khel tura Caceres ka lak khan theihna sang tak a nei a ni tih ka hria a, Manchester City-in an lei duh dan aṭang hian a hmasawn dan chu kan hrethiam mai awm e. Club lian zawkah kan player-te kan chhuahtir chuan lawm mai hi kan tih tur a ni," tiin Caceres an chhuahtir chu lawmna tur zawk a nih thu a sawi.