FA Cup Zaninah Aston Villa tan fiahna

Premier League club Aston Villa-in zanin dar 1:15-ah FA Cup third round second leg an khel dawn a, Villa Park-ah League Two-a parukna dinhmun luah mek Wycombe Wanderers an mikhual ang.

Team pahnih hian Wycombe khelmual Adams Park-a an inkhel-ah chak zawk awm loin goal khat ve ve khungin an inhnehtawk a, zaninah second leg an khelh a ngaih phah dawn.

Aston Villa hian kar hmasa Premier League match-ah Crystal Palace chu 1-0 in an hneh a, Tim Sherwood an ban hnua an manager Remi Garde hnuaia an chakna hmasa ber a ni. Villa hian Inrinni zan khan Premier League table-a pahnihna ni mek Leicester chu 1-1 in an inhnehtawkpui bawk a, tun hnaia an khelh dan enin League Two club hi hneh thei tura beisei an ni.

Villa manager Remi Garde chuan, "Ka player-te nen hian season laklawha inhrawn kan ni a, pre-season inpuahchahna pawh nei ho lo kan nih avangin hnathawh a harsa lehzual a ni. Ka player-te tan mi thar ka ni a, darkar rei lote chhunga engkim hi thlak danglam theih a ni lo," tiin zawi zawia hma an sawn chhoh thu a sawi.

Hetihlai hian Wy-com-be Wanderers chair-man Andrew Howard chuan an khuaa office leh sum-dawnna kalpuitute chu an hnathawkte inkhel en tura ban hma tir turin a ngen!

Bristol vs West Brom

Premier League club zingah West Brom an inlan dawn bawk a, Baggies hian zanin dar 1:15-ah Championship club Bristol City an lenchilh dawn.

West Brom khelmuala an inhmachhawn hma-sakah team pahnih hi goal hnih ve ve khungin an lo inhnehtawk tawh a, West Brom tan khualmualah Bristol hi zuam ngawt chi an ni lo ang.

Baggies tan karhmsa Nilainia Stamford Bridge-a Chelsea nen 2-2 a an inhnehtawk ṭuma inhliam midfielder James Morrison leh Southampton laka an tlawm ṭuma inhliam Darren Fletcher-te an inlan thei dawn lo.

Baggies hian khual-mualah hnehna an chang thei a nih chuan an FA Cup kalkawng a awlsam dawn a, zanin an inkhela chak zawk zawk hian fourth round-ah League One club Peterborough United an hmachhawn dawn a ni.