Anfield-a United chakna Rooney GOAL

Football-ah goal a pawimawh ber tih Pathianni zana Liverpool leh Manchester United inkhelh ṭumin chiang takin a lang nawn a, minute 90 chhung inkhel thununtu Jurgen Klopp-a hote chu hun tawp hnaih lama Wayne Rooney goal vangin an chak lo.

Anfield-ah mualneitu Liver-pool-in nung takin inkhel bul an ṭan a, Reds ball inpe kual chu United player-te'n an thlir a, a hun takah Spanish goalkeeper ṭha David de Gea a inlar ṭhin bawk. Minute 78-naah player hlawh tam danglamna a lang a, United captain Rooney-a'n Belgian midfielder Marouane Fellaini crossbar tauh per rawn let chu chiang takin a hlap lut.

Louis van Gaal-a hoten match 22 khelhah point 37 an hmu a, Champions League khel pha china awm Tottenham Hotspurs point hnih chiahin an pha lo. Liverpool erawh Arsenal an draw hnua United an hneh loh avangin point 31 hmuin pakuanaah an la inham tang hram a, nizan result a zirin 10-naah an tla thei bawk.

Rooney Record

Manchester United leh Eng-land tana captain hna chelhtu Rooney hi a khelh danah sawisel hlawh ṭhin mah se kum 2006 tharah goal hmangin amah seltute a chhang let.

Kum 30-a upa Rooney hian Anfield-ah January 2005 hnua a vawi khatna atan goal a khung a, Premier League-a club pakhat tana goal khung tam ber record a siam. English striker Rooney hian United tan goal 176 a khung a, Arsenal tana Thierry Henry goal khung zat 175 lehpelin Premier League history a siam.

Kuminah Rooney hian goal nga a khung tawh. Newcastle nena 3-3 an inhnehtawk ṭumin United captain hian goal hnih a khung a, FA Cup third round-a Sheffield United leh league match-a Swansea City an hneh ṭumin goal a khung bawk.

Player class lo

Klopp-a hnuaia player-te khelh dan hi 'gegenpressing' tih a ni a, German coach hnuaiah hian player-te an thawkrim a, awmze neia an tlan tam avangin an hmuhnawm tel bawk.

Liverpool hian coach thar hnuaiah Chelsea, Manchester City, Southampton leh Stoke City te hneh tawh mah se tlarhmaah player ṭha bik an kawl lo. Roberto Firmino leh Jordan Henderson te thiam viau mah se an finishing aṭanga thlirin a thiam tak tak zinga chhiar tel an harsa a, substitute Christian Benteke lah a danglam chuang lo. United keeper David de Gea hi player
ṭha bik a ni a, Liverpool tlarhma class tawk loh zarah a ropuina belhchhahin a awm bawk.

Eng nge an sawi?

Liverpool manager Jurgen Klopp chuan, "Manchester United goal chance neih kha ka hmu meuh lo, keini lam khan kan hun ṭha neih kan hlah a ni. Point kan hloh miah lohna tur inkhelah kan chak lo a ni. Kan tihtur kan tih tawk loh vangin goal an khung a, kha aia ṭha khan set piece kha kan veng tur a ni. Goal chance insiam kawngah chuan kan che ṭha thei a, chutihrualin kha aia tam chance insiam thei tur kan ni a, a tawp kan khar ṭha lo bawk," tiin an khelh dan thlirin chak lo tur an nih loh thu a sawi.

German coach sawi ang chiahin United-in chance an nei meuh lo a, Louis van Gaal-a hoten Anfield-a goal zawna vawi khat an petah goal an khung. Hei chauh hi a ni lo, Old Trafford-a United-in Liverpool 3-1 an hneh ṭum pawhin goal zawna an pet apiang a goal tawh bawk.

Manchester United manager Louis van Gaal chuan, "Rooney hi Everton tan a khel tawh a, tunah United tan a khel, ani tan chuan Liverpool lama pet goal hi a pawimawh bik a ni. Kum 2016-ah bul kan ṭha a, season khata Liverpool vawi hnih hneh hi a lawmawm. Anfield-ah chak turin kan kal a, kan hlawhtling. Tuna kan tum chu season tawpa a sang pathuma awm a ni," tiin a sawi.

Dutch manager Van Gaal hian United hmelma Liverpool hneh mah se attacking game an khelh tlat loh avangin Red Devils supporter-te lakah a la tla tlum pha lo a, a hmalam hun pawh hi an hmabak result-ah a innghat thui hle. United hian Inrinni hian harhtharna chang mek Southampton an mikhual dawn a, Liverpool erawh FA Third Round-a Exeter an draw vangin Nilaini zanah Anfield-ah League Two club hi a mikhual ang.