I League Odafa tibeidawngtu Subrata Paul

DSK Shivajians FC-in an club history-a I League match an khelhna hmasa berah Sporting club de Goa an tlawh a, Fatorda Stadium-ah point hlu tak an hlawh chhuak.

Pathianni tlai inkhelah India keeper Subrata Paul chu DSK Shivajians tan a che ṭha hle. Bengali keeper hian Nigerian striker ṭha Odafa Okolie goal khung tur a dan sak a, hun tawp lamah substitute Marcus Mascarenhas chauh hmachhawnin Goan striker hi a ti beidawng bawk.

Hun tawp lamah Sporting Club defender Loveday Okechukwu ball tauh chuan goalline pel ngei angin lang mah se Nigerian defender goal khung hi pawm sak a ni lo.

Goan club-in chance ṭha an ngah a, I League club thar DSK Shivajians FC an chhia tihna erawh a ni lo. Coach tawnhriat nei ṭha Derrick Pereira hnuaia khel DSK Shivajians FC-in defensive game khawng tak an khel a, hemi kawngah hian Afghanese midfielder Zohib Islam Amiri leh Mizo defender Zohmingliana Ralte-te an khel ṭha hle.

DSK Shivajians hian an match hmasa berah point khat an hmu nghal a, Zirtawpni hian Rajiv Gandhi Stadium, Mualpuiah point la hmu lo Aizawl FC an hmachhawn ang.

Inkhel dangah East Bengal FC-in nikum season-a an chak lohna hmun Cooperage Ground-ah Mumbai FC goal awm loin an draw a, Robert Lalthlamuana captain-na hnuaia khel East Bengal hian point hnihin Mohun Bagan leh Bengaluru FC an pha lo.