Kohli-a record-in India chakpui zo lo

Pathianni zan khan ODI series khelh mekah India leh Australia chuan an match thumna an khel a, India tan Virat Kohli-a'n record siam mah se India a chakpui zo lo.

Melbourne Cricket Ground (MCG), Melbourne-a inkhelah hian Virat Kohli chuan ball 117 a hmachhawnah run 117 a vaw chhuak a, ODI-a run 7000 vaw chhuak tura match mamawh tlem ber a ni.

Kohli hian run 7000 vaw chhuak turin ODI match 161 a khel a, record dinglai South African batsman AB de Villers-a'n match 166-a run 7000 a vuak chhuah chu a khum chiang hle.

Delhi tlangval Kohli hian ODI century vawi 24 siam tling tura match mamawh tlem ber record a siam bawk a, century vawi 24 siam tur hian match 161 chiah mamawhin amah hnaihtu ber Australia captain hlui Ricky Ponting chuan ODI century vawi 24 vaw chhuak tur hian match 278 a mamawh a ni.

Kohli-a tana lawm ti kimlotu erawh India a chakpui zo chuang lo hi a ni. India hian over 50-ah run 295 vaw chhuakin mi paruk an hloh a, Kohli bakah run 68 vaw chhuaktu Shikhar Dhawan leh run 50 vaw chhuaktu Ajinkya Rahane-te pawn an khel ṭha thawkhat viau.

ODI match thum an khelh tawhah Indian batsman-te khel ṭha thawkhat viau mah se bowling lam erawh an dang pangngaiin an khel chhia a, Australia bawkin hnehna an chan leh phah. Australia hian over 48.5-ah run 296 vaw chhuakin mi pasarih an hloh a, wicket thumin hnehna an chang.

India leh Australia hi ODI series match nga khel tur an ni a, match thum an khelh tawhah Australia-in 3-0 a hmahruai mekin India tan series lak a beiseiawm tawh lo.