Arsenal-in point khat hlawh chhuak

Premier League hmahruaitu Arsenal-in an chet ṭhat theih lohna hmun Britannia Stadium-ah point khat an hlawh chhuak. Pathianni zan Premier League inkhelah Stoke City nen goal awm loin an inhnehtawk a, inkhelh zawha langsar ber chu keeper Petr Cech a ni.

Stoke khelmualah Arsenal hian league match an khelh hnuhnung vawi riat aṭangin vawi khat chiah hnehna an chang thei. Tun season-ah league match 22 khelh tawh aṭanga point 44 hmuin table hmahruaitu la ni mah se Leicester nena an danglamna chu goal difference chiah a ni.

Stoke hian tun season-ah Britannia Stadium-ah hian Manchester City, Manchester United leh Chelsea te pawh an lo hneh tawh avangin Arsenal tan point khat hi a chhe loah a ngaih theih.

Gunners-in an star player pahnih Alexis Sanchez leh Mesut Ozil te hliam vangin an chhawr thei lo a, an goal nawr a na tawk lo. Alex Oxlade-Chamberlain goal shot ṭha tak mai leh striker Olivier Giroud head goal ngei tur nia lang lo dangtu Stoke keeper Jack Butland a khel ṭha takzet bawk.

Ozil tel lo Arsenal

Real Madrid aṭanga North London club zawmtu Ozil-a'n ke na vangin Stoke a hmachhawn thei lo a, Arsenal goal nawr a na lo sawt. Santi Cazorla a inlan theih loh bawk avanga midfield laia pawh luh Alex Oxlade-Chamberlain chu danglamna thlen thei khawp a
ṭha a ni lo tih a lang.

Tun season Premier League kal meka ṭhiante goal khung tur vawi 16 siamsak tawhtu Ozil tel lo chuan striker Giroud a hlauhawm tawk loh bakah England international Chamberlain hi khelmual sir lama chak taka ball tlanpui chi zawk a ni.

Kulhpui Cech

Newcastle legend Alan Shearer chuan Arsenal-in Cech an neih miau avangin champion thei tura an ṭhat tawk thu a sawi. Chelsea keeper hlui hian an tlarhnung pawp tur a hliah khuh hram hram a ni ber.

Czech international hian Stoke goal khung ngei tur nia lang chu vawi ruk ngawt ṭha tak takin a dan sak a, Arsenal tan league match 22 khel tawhin vawi 10 clean sheet a nei leh der tawh.

Eng nge an sawi?

Arsenal manager Arsene Wenger chuan, "Inkhelh har-sat-na hmunah player ṭha ṭhenkhat tel loin kan kal a, 0-0 hi result chhiaah ka ngai lo. Tharum hmanga inbeihna a nasat avangin a harsa ṭhin a ni. Kan thawkrim a, kan impumkhat
ṭha hle bawk tih a lang. Nikuma kan len luh ai chuan kan khelh danah nasa taka hmasawna hmuh tur a awm avangin a lawmawm," a ti.

Stoke boss Mark Hughes chuan, "Tharum leh foul nasa tiin min sawisel ṭhin. Mahse, tun ṭumah khan yellow card pakhat pawh phawrh a ngai lo. League champion nih tum nen kan inkhel a ni a, a pumpuia thlirin kan ti chhe hran lo," tiin a sawi.

Hmabak

Arsenal hian Pathianni zan hian champion lai Chelsea an mikhual zui dawn a, Stoke pawh Inrinni zan hian Leicester City khel turin an zin chhuak ang.