Costa dinhmun a chiang lo

Chelsea striker Diego Costa chu Inrinni zana Everton nen an inhnehtawk ṭumin hliam vanga lakchhuah a ni a, Spain international hi uluk taka enfiah a nih hnuah a ngal a vung tih hmuhchhuah a ni.

Kum 27-a upa striker hian Everton nen 3-3 a an inhnehtawkna inkhelah hian goal a khung bakah a ṭhiante thun tur a siamsak a, mahse a hliam vang hian minute 80-naah lakchhuah a ni.

Inkhelh zawhah Chelsea manager lailawk Guus Hiddink chuan Costa hliam chu a nat takzet thu a lo sawi tawh a, a chawlh hun chhung tur erawh a sawi thei lo.

Guus Hiddink-a'n Chelsea a enkawl hnuah season ṭan tir lama beisei phak lo Costa a insiam ṭha mek a, season hmasa a Jose Mourinho hnuaia goal 20 khungtu striker hian Dutch manager enkawlna hnuaiah match nga khelin goal nga a khung tawh a ni.