Venus Williams a tla nghal

Thawhṭanni aṭang khan Australian Open khelh ṭan a ni a, hmeichhe single seeded pariatna Venus Williams chu Britain number 1 Johanna Konta hneh loin first round-ah a tla nghal.

Rod Laver Arena-a inkhel-ah kum 24-a upa Konta hian minute 79 chhungin Grand Slam vawi sarih champion tawh Williams hi 6-4, 6-2 in a hneh a ni.

World number 47 Konta hi Australian Open-ah a vawi khat inlanna a ni a, a match hmasa berah result ṭha a hlawh chhuak nghal. Konta hian nikum khan US Open last 16 a lo inhlangkai ve tawh bawk.

Kum 35-a upa Venus hi tunah hian WTA ranking-ah 7-na a ni mek a, tun hnai kum 20 chhunga hmeichhe single ranking sang zual 10 zinga tel thei upa ber a ni nghe nghe.

Konta chuan, "Williams ka hmachhawn dawn tih ka hriat khan darkar khat chuang kan inkhelh kha chu ka ring nghal a, rin ang ngeiin thil a thleng. Player ṭha leh tawnhriat nei ngah ka hneh avangin inrintawkna ka neih belh ka beisei. Ka player pui zinga ka zah tak mai ka hmachhawn a, ka ball vuak tur leh hmachhawn apiang maiah khan ka fimkhur em em vek a ni," a ti.

Margaret Court Arena-a inkhel dangah Maria Shara-pova-i'n harsa lutuk loin Nao Hibino chu darkar khat leh minute 13 chhungin 6-1, 6-3 in a hneh bawk.

World number 5 Sharapova hian Grand Slam tournament-ah bul a ṭan ṭha thei hle a, a match hmasa ber 47 aṭangin vawi 46 hnehna a chang thei. Kum 2003 khan Grand Slam-ah a inlan ṭan aṭangin 2010 Australian Open first round-a Maria Kirilenko a hneh loh bak kha chu tlawm a la nei lo a ni.

Russian star Sharapova chuan, "A nihna takah chuan tun hmain Hibino kha ka hre ngai vak lo, mahse kan inkhelh tak aṭang chuan player ṭha tak a ni tih ka hria. Grand Slam tournament-ah tawn hriat a la nei tlem deuh tih hriat ni mah se hmalam hun êng tak a nei tih a chiang. Engpawh nise hnehna ka chan avangin ka lawm," tiin a sawi.

Inkhel dangah Wimbledon finalist Garbine Muguruza chuan first round paltlang turin darkar khat chiah a mamawh a, world number 85 Anett Kontaveit lakah 6-0, 6-4 in hnehna a chang.

Seeded pathumna Mugu-ruza hian Melbourne Park-ah tun hnai kum hnih chhungin fourth round a thleng thei a, kuminah quarterfinal luh a inbeisei sang hle. First round-ah hian a khingpui Kontaveit service hian set khatnaah game a hloh a, set hnihna la turin harsatna a nei lo.