Norwich defender thar Klose

Premier League club Norwich chuan Switzerland defender Timm Klose chu German club Wolfsburg aṭangin an la lut a, a man zat an puang zar lo thung.

Kum 27-a upa Klose hian Bundesliga club tan hian inelna hrang hrangah match 39 a lo khel tawh a, Norwich tan hian kum thum leh a chanve daih contract a ziak.

January transfer chhungin Norwich hian player pali an la lut tawh a, Klose an lak hma hian Matt Jarvis, Ivo Pinto leh Ben Godfrey te an lo la lut tawh bawk.

Klose chuan, "Premier League khelh hi ka duhthusam a ni a, tunah Norwich-in hun ṭha min siamsak hi ka lawm hle. Ka club tan hian ka theihna sang ber ka hlan ang," a ti.

Swiss centre back Klose hian Wolfsburg leh Man United te Champions league-a an in-hmachhawn ṭum khan a inlan a, Switzerland tan pawh Euro 2016 qualifier-a England an hmachhawn ṭumin a inlan ve tawh bawk.