I League Ticket Bihchianna-Aizawl FC-in mi nawl pui tan ticket an siam em?
I League club tan match zawng zawnga an result a pawimawh vek a, supporter-te erawhin match ngaih pawimawh bik an nei a, player leh club a zirin en châk bik an nei. India ramah chuan Kolkata Derby-in ngaihhlut a hlawh ber a, Mohun Bagan leh East Bengal inkhel entu mipui zat chu nuai khat chuang an ni ṭhin.
Entu an tam
Mizoram pawhin I League an ngai hlu a, Aizawl FC leh Bengaluru FC inkhelh ṭumin Mualpuiah mipui sing khat (?) bawr vel an pungkhawm a, ticket man Rs 1000, Rs 500, Rs 200 leh Rs 100 tih hriat phei chuan football hmangaihtu tan chuan inkhel en tura mipui tlim hmur ringawt pawhin mittui a ko ngei ang.
Entu tam chhan hrang hrang awm theite chu I League match Mizorama khelh hmasak ber a nih avang te, Aizawl FC hmachhawn team chu India rama kalphung mumal ber leh 2014 champion Bengaluru an nih avang te, India captain Sunil Chhetri bakah nikuma Indian player zinga mimal chawimawina dawng tam ber Eugeneson Lyngdoh khelh vang te, Bengaluru-a Mizo player hmuh châk avang te, TV-ah live telecast a nih dawn loh vangte leh I League-a Aizawl FC dinhmun hriat châkna te chu chhan langsar zual a ni.
Ticket man to pawisa loin mipuiin Aizawl FC inkhel an hlut a, ticket chang lo pawhin mualpho huamin stadium an pan. Aizawl FC tana hna hmasa ber chu anmahni ṭantu tam zawk leh rinawm zawk siam a ni a, an tih theih hmasak ber chu ticket man tih tlawm a ni.
Engtin zel?
Aizawl FC-in Thawhṭanni khan DSK Shivajians leh Sporting Clube de Goa an hmachhawn huna an ticket man zat tur an rel a, mipui barakhaih zawng takin thutlukna an siam. Gallery chunglam match hmasa bera ticket man Rs 200 chu Rs 500 leh Rs 300 manah tihsan a ni a, gallery hnuai ticket man thlak danglam a ni bawk. Ticket man Rs 1000 a awm tawh lo a, a hma lama ticket Rs 500 leh Rs 1000 man ticket chu Rs 2000, Rs 500 leh Rs 200 man ticket-ah ṭhen sawm a ni.
Ticket manto ber Rs 2000 leite hian jersey leh ei tur an dawng tel dawn a, man tlawm ber Rs 100 erawh tih danglam a ni lo. I League hi German team anga vawi khat chauh inkhel tur an ni lo a, Aizawlah match sarih khelh hmabak a la awm avangin mi nawlpui tan chuan ticket man hi a to deuh niin a lang.
Entawn tlak Blues
Bengaluru FC-in 2013-14 season aṭangin I League an khel ṭan a, an ṭan kum phat aṭangin professional takin engkim an kalpui a, awmze neiin ticket an siam. Blues media manager Kunaal Majgaonkar chuan, "Ṭhutna awm thei china ticket man tlawm ber Rs 200 man a ni kha chu a to mah mah ka ti. Aizawl FC in DSK Shivanjians leh Sporting de Goa te an hmachhawn hun tur hi kartawp a ni dawn lo a, chuvangin Rs 200 emaw Rs 500 emaw ticket lei thei chin chuan office an kal a ngai ang," tiin Aizawl FC ticket kalphung chu a fuh tawk loh thu Vanglaini palai a hrilh.
Bengaluru-in tun dinhmun an thlen theih nana rilru seng nasa Kunaal chuan an club chungchang sawiin, "Bengaluru-ah chuan mi nawlpui lei ngam tur Rs 30-50 inkar ticket kan siam a, college student te ngaihtuah ranin Rs 200 kan siam a, tlem a nei nung deuh tan Rs 400 leh Rs 650 a awm a, a man to ber chu Rs 1500 a ni," tiin mi zawng zawng mil ticket an siam thu a sawi.
Blues hian tun hi I League-a an season thum khelhna a ni a, engtik lai pawhin Benglauru FC hian ṭantu an nei ṭha. Inkhel entu hi chawhrualin 10,000 aṭanga 15,000 a ni ṭhin. Aizawl FC hian ṭantu an neih dan a zirin I League club lian zawk an entawn a la ṭul ang.
Kolkata lamah chuan
Champion lai Mohun Bagan leh East Bengal te awmna Kolkata hi India rama football ngaihhlutna ber hmun ti pawhin sawi ila, a hnial ngam an tlem khawp ang. Club lian pahnih hian Salt Lake Stadium-a match an neih chuan inkhel en man hi Rs 100 vek a ni a, VIP tan Rs 500 a ni. Chutihrualin Barasat Stadium-a match an neih chuan inkhel en man hi Rs 75-ah te a tlahniam ṭhin.
Kolkata derby-ah erawh inkhel en man tihsan a ni a, Bagan leh East Bengal inkhel en tura pawisa chawi ngai zat chu Rs 100, Rs 150, Rs 200 leh Rs 300 te niin VIP tan Rs 500 a ni. A tawi zawng chuan Kolkata derby aiin Aizawl FC inkhel en man a la to zawk a ni.
Ṭhenawm state-ah chuan
Shillong Lajong hi ṭantu nei ṭhaa sawi ṭhin an ni a, inkhel en man pawh a tam lo. Lajong inkhel en man hi Rs 50, Rs 70, Rs 200 leh Rs 500 mante a ni. Ticket man tlawm Rs 50 leh Rs 70 man leite ṭhutna hian chung a nei lo a, Rs 200 man hi a chung nei chinah an ṭhu a, Rs 500 man hi VIP ticket a ni.
Aizawl FC harsatna
I League khel turin Aizawl FC-in sum tam an seng a, Rajiv Gandhi Stadium capacity thlirin state dang club aia ticket man an chhiar to hi a mak lo. Chutihrualin Aizawl FC hian an club khelh tur milin ticket an siam lo niin a lang a, mi nawlpui milin ticket an siam lo bawk.
Aizawl FC hian an thupui 'The People's Club' hre rengin mi zawng zawng en theih turin ticket siam se tih hi football ngainatute duhthusam a ni. Chutihrualin mipuite tana hriat reng tur erawh Aizawl FC hi Mizoram club an ni a, I League-ah chuan Mizo mipui aiawh an ni a, ṭan rawn hi an phu an ni.