FA Cup Reds dinhmun a him lo

Liverpool manager Jurgen Klopp-a'n FA Cup third round-ah awlsam taka chak theih a inbeisei a, player naupang rual chhawrin League Two club Exeter City a hmachhawn.

Mahse, Klopp-a'n Exeter khelmualah a beisei ang result a hmu lo a, an khingpui nen hian 2-2 a inhnehtawkin Anfield-ah second leg an khelh a ngaih phah. Zanin dar 1:30-ah Liverpool leh Exeter City hian FA Cup fourth round luh an inchuh dawn.

Tun hnai dinhmun

Liverpool-in tun hnai an inkhelah beisei an phak lo a, an hmachhawn tur club hi League Two club ni mah se khualmuala an inhnehtawkpui miau avangin an tan ngaihthah a thiang dawn lo.

Reds hian inkhel an hmachhawn hnuhnung pangaah vawi khat chiah chak hmel an hmu thei a, vawi hnih a tlawm zawkah ṭangin vawi hnih an khingpuite an inhnehtawkpui.

Liverpool hian Exeter an hma-chhawn hma an match hnuhnung berah Manchester United chu 1-0 in Anfield-ah an hneh lo a, Anfield-ah tho Arsenal an inhnehtawkpui avangin an khelmualah a zawna match thum chak result hlawh chhuak zo lo nih hi an duh lo ang.

Anfield-a lenglut tur Exeter-in tun hnaiah result duhawm an nei hleithei bik lo. Inkhel an hmachhawn hnuhnung pangaah vawi hnih tlawmin vawi hnih an khingpuite an inhnehtawkpui a, vawi khat chak zawkah an ṭang.

Reds an hmachhawn hmaa an match hnuhnung berah erawh Exeter-in 3-1 in hnehna an chang a, an khelmuala an chelh din theih Liverpool hi khualmualah chak tumin an hmachhawn ang.

Team inthlau chu

English football inelnaah Premier League a sang ber a, a hnuaiah Cham-pionship, League One leh League Two-te a awm a, England rama professional huang chhungah chuan League Two hi division hniam ber a ni.

Premier League-ah Liverpool-in besiei phak lo chungin 10-na dinhmun an luah mek a, League Two-ah Exeter-in 14-na dinhmun an luah. Chumi awmzia chu team pahnih inkarah hian club 72 lai an awm tihna a ni a, Exeter aia Reds chungnunna hi tam tak a ni.

Team pahnih hi an player-te man zat aṭanga chhut pawn an inthlau a, Exeter player zingah pound maktaduai 1 man kai pawh an awm mang loh laiin Liverpool player erawh pound maktaduai 30 chuang man Christian Benteke-te ho awmna a ni.

Inkhel chhehvel

Exeter khelmuala an inhnehtawk
ṭumin Liverpool manager Jurgen Klopp-a'n, "Ka naute khan an theihna zawng zawngin an khel a, mahse a harsa a ni. Team pahnih danglamna chu Exeter chuan long ball pet hun tur an hria a, kan khelh ṭan lohna khelmual ṭha lutuk loah kan khelh avangin khelmual hre chiangtu Exeter player-te khan an khelh ṭhat theih phah a ni, " tiin a lo sawi tawh a, zaninah an khelmual Anfield-ah ngei an inkhelh dawn avangin chhuanlam siam a thiang tawh lo ang.

Exeter-in Liverpool an hmachhawn hmaa an match hnuhnung bera Leyton Orient 3-1 a an hneh ṭumin Jayden Stockley leh Tom Nichols-te'n goal an khung ve ve a, anni pahnih hi Liverpool laka goal khungtu te tho kha an nih avangin Reds tlarhnungte'n an ni pahnih hi an ven uluk a ngai khawp ang.

Reds lawmna

Tun hnaiah Liverpool-in khelmual chhungah chanchin lawmawm nei hleithei lo mah se khelmual pawnah erawh chanchin lawmawm an nei thung a, an keeper ṭha Simon Mignolet chuan Liverpool-ah kum nga dang cham turin contract thar a ziak.

Belgian keeper hian kum 2013 khan Liverpool hi pound maktaduai 9-in a zawm a, Merseyside club tan hian vawi 122 lai inlan tawhin kum 2015 chhung khan match 15 chhung goal a chhuah lo a, Premier League goalkeeper zingah nikuma goal chhuah tlem ber a ni.

Kum 27-a upa Mignolet chuan, "Con-tract thar ka ziah avangin ka mawhphurhna a lian lehzual dawn tih ka hria a, ka theihtawp ka chhuah chhunzawm zel ang. Kan goalkeeping coach-te hnuaiah hmasawn zel ka tum ang a, contract thar hmanga min rintawkna an tihlan hi khelmualah chhanlet ngei ka tum ang," tiin hmasawn zel a tum thu a sawi.

Mignolet-a thachhang dawltu Adam Bogdan-a'n beisei a phak lo a, Watford laka 3-0 a an tlawm ṭum leh Exeter 2-2 a an inhnehtawkpui ṭuma tihsual a neih nual avangin Mignolet-a contract thar ziak hi Reds tan chanchin lawmawm a ni.