Mizoram cricket 1st division huang aṭangin Armed Veng hnawhchhuah an ni!

Mizoram cricket first division tournament Mahuma Memorial tournament chu a hmawr bawkin a awm dawn hnai ta. Team pariat awmna league-ah hian round tawp ber khelh ṭan a ni tawh a, first division inelnaah tun season-a kai thar Chhinga Veng Cricket Club chuan hma an sawn a, hetihlai hian team hlun ber pawl Armed Veng Cricket Club erawh second division lamah an tla thla thung.

First division-ah hian team pariat - Armed Veng, Chaltlang, Chanma-rians, Chhinga Veng, Kulikawn, Ramhlun Venglai, Zarkawt Lords leh Zemabawk Pitchers-te an awm. Heng team-te hi vawi khat ṭheuh inkhel kual tur an ni. Nimin
aṭang khan round tawp ber an khel ṭan a, table a ngaihnawm chho hle.

Tun season aṭang hian first division inelna hi over 40-a khelh a ni a, hetianga over rei zawk khelhna tournament hi tun hmain Mizoram chhungah a la awm ngai lo a, a tlangpuiin over 20-a khelh ṭhin a ni.

Nimin thleng khan team paliin league-a an match hnuhnung ber an khel tawh a, he thu buatsaih lai thleng hian champion lai Chanmarians chuan match sarih khelhah point 10 hmuin hma an hruai mek a, league bika an match khelh tur an khel zo tawh. An hnuai chiahah hian kai thar Chhinga Veng awmin match ruk khelhah point 8 an hmu tawh a, anni hian an league match tawp berah tun season-a second division aṭanga first division-a an kai pui Ramhlun Venglai an hmachhawn dawn a, an chak chuan table-a hmahruai turin dinhmun duhawm takah an ding mek.

Hetihlai hian Mizo-ram cricket-a club hlun ber pawl Armed Veng erawh, niminah Chanmarians hi run 120-a an hneh loh avangin season tharah chuan second division lama an khelh a ṭul tawh ang.