Rafael Nadal a tlawm

Grand Slam vawi 14 cham-pion tawh Rafael Nadal chu 2016 Australian Open first round aṭangin Fernando Ver-dasco hneh loin a tla.

Nimin khan Rod Laver Arena-ah Nadal hian kumina a Grand Slam match hmasa ber a khel a, darkar li leh minute 41 zet an inhmachhawn hnuah Verdasco lakah hian 7-6, 4-6, 3-6, 7-6, 6-2 in a tlawm.

First round inkhelah Spanish player pahnihte hi an inkhing tawk hle a, harsa taka set hnih ve ve an lak hnuah set ngana khelh a ni.

Set hnuhnung berah hian Nadal-a dinhmun a ṭha hman hle a, game hmasa pahnih a lak bakah game thumnaah break point a hmu leh hial. Mahse, world number 45 Verdasco hian game hnuhnung paruk la zawn vekin hnehna a chang a, second round-ah Dudi Sela a hmachhawn zui leh dawn.

Rod Laver Arena-ah tho hian kum 2009 khan Nadal leh Verdasco-te hian semifinal an lo khel tawh a, darkar nga leh minute 14 hnuah Nadal-a'n hnehna changin Australian Open history-a inkhelh hun chhung rei ber ṭum a la ni nghe nghe. Khami
ṭum ai khan tun ṭumah hian minute 35-in an inkhel rei lo zawk a ni. Verdasco hian kum sarih hnuah phuba a la ve leh chiah.

Kum 32-a upa Verdasco chuan, "Set hnuhnung ber ka khelh dan kha chu ka beisei phat bak a ni. Ka hriatthiam dan chuan ka maimitchhing a, thil kha ka duhdan vekin a kal a ni ber mai. Kum 2009 kha ka la hre reng a, vawiin pawh khan khatianga rei kha kan inkhel leh dawn emaw ka ti hman. Rafa nen set nga kan inkhelh hnua hnehna ka chang thei hian ka lawmna a ti zual hle," a ti.

Nadal-a hun a liam

Khawvela tennis player ṭha ber zinga mi ni mah se Nadal hian nikum aṭang khan mojor tournament-ah hlawhtlinna a chang thei tawh lo. Grand Slam tournament paliah semifinal pawh a lut phak lo vek a ni.

Nikum chhunga Nadal record chu Australian Open (QF), French Open (QF), Wimbledon (2R), US Open (3R) te a ni a, kuminah a match hmasa berah a chak lo leh nghal bawk. Tun hnaia a sulhnu thlir hian Nadal a hun a liam ve tawhah a ngaih theih.

Kum 2009 Australian Open champion Nadal hian he inelna hi ṭum 11 a hmachhawn tawh a, tun ṭum hi first round-a a tlak vawi khatna a ni. Kum 2012 leh 2014 khan final a lut a, mahse Novak Djokovic leh Stan Wawrinka-te a hneh lo thung. Match 45 khel tawhin vawi 10 a tlawmna chiah a ni bawk.

Grand Slam inelna bikah tum ṭum hi Nadal-a first round-a a tlak vawi hnihna chiah a ni a, kum 2013 khan Wimbledon-a a match hmasa berah a lo tla nghal tawh bawk.

Murray a chak nuamsa

Britain number 1 Andy Murray-a'n a match hmasa berah harsatna a tawk lo. Thawhṭanni khan German teenager Alexander Zverev chu 6-1, 6-2, 6-3 in a hneh. Kum 28-a upa Murray hian Ningani khian second round-ah khawtual tlangval Sam Groth a hmachhawn leh ang.

Beisei loh dang

Hmeichhe inelna lamah pawh beisei loh result kan hmu zui a, nimin vek khan world number 2 Simona Halep chu Shuai Chang lakah 6-4, 6-3 in a tlawm bawk.

Kum 24-a upa Halep hian nikum khan season duhawm tak a hmang a, title pathum lain chung zingah chuan In-dian Wells pawh a tel. Mahse, kuminah erawh beisei a phak lo hle. Kar hmasa khan Sydney International-ah Svetlana Kuz-netsova a hneh lo a, Austra-lian Open-ah a match hmasa berah a chak lo leh nghal a ni.