Point hmu lo chuan haw kan tum lo - Zotea

Nimin khan Zir-tawpni tlaia Aizawl FC hmachhawn tur DSK Shivajians-in Aizawl an rawn thleng. I League club thar hian match khat khel tawhin Sporting Clube de Goa nen goal awm loin an inhnehtawk a, match hnih khel tawh MPL champion Aizawl FC aiin point khatin an hmu tam zawk.

DSK Shivajians defender Zohmingliana Ralte chuan, "Aizawlah hian point hmu tura lokal kan ni a, point hmu lo chuan haw kan tum lo. Kan hneh ngei poh ka ring. Aizawl FC nen player-te pawh kan in tluk tawk viauin ka hria a, amaherawhchu anni aiin kan team-ah I League-a tawnrhiat nei kan tam zawk a, kan chhawr ṭang-kai ngei ka ring," tiin chak ngei a inbeisei thu a sawi a, Ramhlun South tlangval hian I League kai thar ve ve an nih avangin an intum tawk tur thu a sawi tel bawk.

Pune khaw club DSK Shivajians-ah hian Mizo pahnih Zotea leh ISL-a Chennaiyin defender Lalhmangaihsanga Ralte (Sena) te an awm. Goan club an hmachhawn ṭum-in India keeper Subrata Paul, defender Justin Stephen, midfielder Zohib Islam Amiri leh Douhou Pierre bakah forward Douhou Pierre te chu player pawimawh an ni a, an player thar French defender Jeremy Labor-a'n a rawn ho theih chuan an ṭha sawt bawk ang.