MFA leh Aizawl FC an thawkho dawn

Mizoram aṭanga I League khel thei hmasa ber Aizawl FC leh Mizoram Football Association-te chuan Rajiv Gandhi Stadium, Mualpuia I League match thlen dan chungchangah thawhhona thuthlung an ziak.

Nimina Aizawl FC leh MFA hruaitute ṭhut-khawmnaah hian pawl pahnihte chuan I-League home match khelh huna tihtur pawimawhte insemin felfai zawka I League match thlen dan tur an rel.

Aizawl FC home match hmasa bera an duhkhawp lohna laite sawihoin I League home match an khelh leh turah security khauh zawka kalpui dan turte an rel a; inkhelenna ticket nei lo an luh lohna turte leh mahni ticket leina hmunah chiah an ṭhut dan turte ruahman a ni.

Inkhel en turte chu match ṭan hma minute 30-ah tal khelmual thleng tawh turin an ngen a, hei hi inkhelh
ṭan hnua ṭhutna leh thil danga harsatna thleng thei chinfelna tura ruahman a ni.

I League danah chuan inkhel reng reng hi a home team-in an buaipui tur a ni a, hetiang hian Aizawl FC chuan an match hmasa ber kha an kalpui. Inkhel buaipui dan fel zawk leh
ṭha zawka kalpui a nih theihna turin Aizawl FC home match lo awm tur dangte hi MFA lamin an vilpui tawh ang a, tun season chhung an thawk dun dawn a ni.