Relegation Zone aṭangin Swansea City an talchhuak

Premier League table mawng lama talbuai Swansea-in chak result an hlawh chhuak a, Watford 1-0 a an hnehna inkhelah hian an coach thar Francesco Guidolin chuan Welsh club hi la kaihruai lo mah se mipui zing aṭangin inkhel a en.

Inkhel ṭan aṭanga minute 27-na lekah Swansea captain Ashley Williams-a'n he inkhela goal awmchhun hi a tauhlut a, Watford tan Miguel Britos leh Jose Manuel Jurado-te'n an si phurh sutna hun ṭha nei mah se goal-ah an chantir thei lo.

Swansea pawhin Bafetimbi Gomis hmangin goal hnih khungna hun ṭha an nei a, mahse Swansea striker hian goal post a pet per. Hun tawp thlenga goal dang a luh tawh loh avangin Swansea 1-0 in an chak. Welsh club hian relegation zone chhuahsanin table-ah 17 na dinhmun an luah a, an hnuai chiaha awm Newcastle United aia an sanna zat hi point khat a ni.

Curtis thukhawchang

Swansea manager lailawk Alan Curtis chuan, "Result duhawm tak a ni. Inkhelh hmain point thum hlawhchhuah kan mamawh zia kan sawi a, a tawpah chuan kan hlawhtling ta a ni. Inkhel pumpui kha thlir ila, chak zawk nih kan phu a ni," tiin chak zawk nih an phu thu a sawi.

Manager thar chu

Swansea-in season tawp thleng Alan Curtis-a'n manager hna a chelh tur thu sawi mah se an thusawi an zuk leh a, Italian manager Francesco Guidolin chu December thlaa an ban tak Gary Monk thlak turin an la lut ta nge nge.

Kum 60-a upa manager chuan, "Dinhmun harsa takah ka team enkawl tur hi an ding a, mahse talchhuak turin squad ṭha tak kan nei a ni. Italy-a club ka enkawl lai chuan ṭha takin ka club enkawlte season ka kharpui ṭhin a, Italy-a ka hlawhtlinna kha Swansea-ah hian ka chhawm theih ka beisei," tiin Welsh club-ah hlawhtlin tuma a kal thu a sawi.

Tunge Guidolin?

Guidolin-a'n Italian club zingah Udinese, Bologna, Parma, Palermo leh Vicenza-te a lo enkawl tawh a, French club ṭha AS Monaco a lo kaihruai tawh bawk.

Serie B club Vicenza a enkawl laiin Italian Cup nomawi a chawpui a, Europe-a an inlan hmasak berah UEFA Cup Winners' Cup semi-final a hruai thleng thei. Vicenza hi Serie A-ah kaipuiin Serie A table-ah hma a hruaipui hman hial a ni.

Viecenza bakah hian Parma leh Palermo chu Serie B aṭangin Serie A a hruai kai bawk. Kum 2013 khan Udinese chu Serie A-ah pathumna dinhmun a luahpui a, Udinese club chanchina an tawn san ber ṭum a ni.

Curtis a lawm

Swansea manager lailawk Curtis chuan amah thlak tura Guidolin an ruai chu a lawm thu sawiin, "Manager pahnih a awm theih loh a, pakhat chauh an awm a ngai. Manager dinhmun luah tura Francesco ruat a ni hi ka lawm hle a ni. Club-in hma a sawnna tura manager lakluh ṭul a ti a nih chuan kei chuan pawi tihna ka nei lo a, ka hlim zawk a ni. Match tam zawk chak ila chu min thlak kher a ngai nang," tiin amah thlak tura manager thar lakluh a ni chu a hrethiam hle.