Luis Suarez faktu Rodgers

Liverpool manager hlui Brendan Rodgers chuan Merseyside club-a a enkawl ṭhin Luis Suarez chuan khawvela player ṭha ber ni tura theihna sang tak a neih thu a sawi.

Rodgers-a enkawlna hnuaiah Liverpool-in kum 2013-14 season khan Premier League nomawi an chawi teuh hle a, he season-a an player pawimawh bera chhal ngam chu Suarez hi a ni.

Tun hnaia club enkawl a tum loh thu sawi chhuaktu Rodgers chuan, "Suarez hian khawvela player ṭha ber ni turin kawng a zawh mek a ni. Ballon d'Or top three-a a lang lo kha thil mak a ni a, mipui hmaa puanzar loh politics inrawlh vang chauha lang lo a ni. World class player nichungin Liverpool kha a chhuahsan a, team ropui tak Barcelona zawmin team
ṭha zawkah a chhuah thei a ni," tiin a striker hlui chu a dah sang hle.

Swansea manager hlui chuan sawi chhunzawmin, "Swansea ka enkawl lai khan player sual leh nungchang
ṭha lo tak niin ka ngai a, box chhungah a hnawksakin defender-te chhaih kawlh kha a thiam em em. Liverpool ka enkawl hnuah kan thawk dun a, match tinah khan a hmasawnna hmuh tur hi a awm reng ringawt mai a ni," tiin Uruguayan striker chuan hma a sawn chak thu a sawi.

Rodgers chuan Suarez chu Lionel Messi, Neymar leh Andres Iniesta-te nen an khelh ho vanga hma a sawn nasat lehzual thu sawiin Ballon d"Or chu engtikah emaw a la dawn ngei a rin thu a sawi a, khawvel striker zingah Messi tih lohah chuan a team-a khel tura a duh ber a nih thu a sawi bawk.