Ramtian lam panin

Asia Cup chu kan lo zo fel leh ta. Awlsam leh hnehsawh takin Rohit Sharma leh a hoten Sri Lanka chu final-ah sawpin, tun dinhmunah chuan kan hma lawk World Cup lo awm turah pawh rinkai ber zinga mi an nihzia India team-in an rawn pholang a ni.

Amaherawchu, thil tamtak la thleng thei a ni a, a tui awpkeu hmaa ar note lo chhiar lawk a ṭha ngai lo e an tih kha maw!

Sri Lanka an zawr

Tunhma 90s chhova khawvel cricket awp ve ṭhin Sri Lanka team kha chu thawnthu ang mai an ni tawh. Tun hnai Sri Lanka team erawh World Cup qualifiers khelh ngai khawpa team lei rem rah leh tum leh indin thar leh mek an ni.

Asia Cup final-ah Sri Lanka hian Mohammed Siraj an ngam lo a. Ni e, Siraj hian a vawm ṭha tehmeuh mai, boruak hnawng leh chhum awm deuh, khatiang ang khua kha Siraj a te ang bowling tana duhthusam a ni a, ball lah a vawm che na rawh e.

Mahse, Sri Lanka batsman tam zawk kha, an khelh dan khan duhthu a sam lo ve bawk. Professional ni loin, amateur rual, a vawi khatna atan stage sanga rawn inlan thut, phur leh zauthau inveng zo leh si lo te pawh an ang zawk.

Eng ang condition pawh nise, One Day International meuha run 50 lek siam hi chu chhuanlam a awm thei lo hrim hrim. School emaw Academy a zirlai naupang ho tihsual awm ang vel leka batting hun rawn hmang an awm nual mai.

A sakhming Siraj

Indian cricket history-ah hian Hyderabad hian batman ropui tak tak a lo theh chhuak tawh ṭhin a, mahse fast bowler leh Hyderabad cricket hi chu thil sawizawm hlawh lo pawl tak a ni. Tunah erawh, Hyderabad khuaa rawlthar ṭhahnem tak chuan Md Siraj hi infuih nan an hman phah ngei tawh ang.

Thil pakhat erawh a chiang ta a, World Cup-ah chuan India tana ball thar vawma inkawp tur te chu Jasprit Bumrah leh Md Siraj te an ni dawn. Shardul Thakur leh Md Shami ten third pacer role an inchuh a ngai ang.

India hian World Champion nih an tum leh ngai a nih chuan, an fast bowling department te hian hma an hruai zat zat a ngai dawn. Tun dinhmuna an form en chuan thla an ti muang hrih viau e.

Inpuahchahna hnuhnung

World Cup ṭan hma a, inenchhinna hnuhnung ber chu Australia nen an nei dawn. September 22, Zirtawpini aṭanga ṭan tur a ni a, tun ṭum series-ah hian game thum a awm ang.

Kaptan Rohit Sharma leh tawnhriat nei ṭha Hardik Pandya Virat Kohli te inkhel hmasa pahnih atan hahchawlhtir an ni. KL Rahul-a'n kaptan chanvo a chelh ang. Shreyas Iyer a tan a fitness dinhmun diktak a pholan theihna hun remchang awmchhun a ni tawh ngei dawn. India tan kil tin, hmun tin inenfiahna hun ṭha a ni.

Engpawh thleng thei

Asia Cup Super 4 inkhel hnuhnung berah Axar Patel-a'n a malpui a tihnat avangin, final an khelh hma niah Washington Sundar chu an khua Chennai aṭangin koh chawp a ni. Chawlhkar khat hnuah a fitness dinhmun a chiang chauh dawn.

Tin, Kuldeep Yadav a hahchawlhtir a nih avangin Ravichandran Ashwin telh a ni ve leh a. Hetah tak hian Australia lakah hian Ashwin, Sundar, Thilak Verma etc te hi an khelh ṭhat viau chuan last minute-ah World Cup-a India aiawh turte hi a la inthlak danglam leh bawih thei ta a ni. Engpawh thleng thei a ni tlat.

Players ṭhenkhat inhliam/damkawr etc lo awm ve nual nen. Tun kar tawp aṭanga Australia nena game 3 series an khelh tur hi, World Cup tana inpuahchhahna hnuhnung ber a nih mai bakah India team hlimtha diktak tilangtu a va nih hmel ta si em. Ramtiam lam panin kal zel ang.

India squad ODI hmasa panih:

KL Rahul (C & WK), Ravindra Jadeja (Vice-captain), Ruturaj Gaikwad, Shubman Gill, Shreyas Iyer, Suryakumar Yadav, Tilak Varma, Ishan Kishan (wicketkeeper), Shardul Thakur, Washington Sundar, R Ashwin, Jasprit Bumrah, Mohd. Shami, Mohd. Siraj, Prasidh Krishna.

India Squad final ODI:

Rohit Sharma (C), Hardik Pandya, (Vice-captain), Shubman Gill, Virat Kohli, Shreyas Iyer, Suryakumar Yadav, KL Rahul (wicketkeeper), Ishan Kishan (wicketkeeper), Ravindra Jadeja, Shardul Thakur, Axar Patel*, Washington Sundar, Kuldeep Yadav, R Ashwin, Jasprit Bumrah, Mohd. Shami, Mohd. Siraj.