Champion lai City an chak

Champions League champion lai Manchester City chuan an nomawi humhim turin kawng dik an zawh nghal, an group match hmasa berah goal chhuah hmasa zuk mah se Julian Alvarez-a goal hnih hmangin Red Star Belgrade chu 3-1 in an hneh.

Thawhlehni zan Etihad Stadium-a inkhelah chawlhlawk hma deuhin Osman Bukari chuan mikhual tana goal hmahruai a khung a, mahse hma an hruai rei lo. Alvarez-a'n goal hnihin a chhanglet a, midfielder Rodri chuan chak a nemnghet bawk.

UCL match a khelh hmasak 26 aṭanga goal 30 khung thei Erling Haaland erawhin a khung lo, an mamawh tawk goal an neih tho avangin a pawi hran lo. Hliam vanga Bernardo Silva lak chhuah a ngai erawh Man City tan harsatna thlen thei a ni mai thei.

Kevin de Bruyne, Jack Grealish, Mateo Kovacic leh John Stones te chu hliam vangin an chawl mek a, tunah Silva a hliam ve leh ta. Citizens manager Pep Guardiola chuan a player hliamte chu buaina tham a nih thu a sawi ta hial.

Guardiola chuan, "A nihna takah chuan a buaithlak ta hle, chutihrualin hliam vangin harsatna kan nei tih lam hawi zawng erawh chuan ka sawi lo ang, kan rilru put hmang a dik phawt chuan a khel thei midangte nen hian hma lam kan pan ang," a ti.

Nipui bazarah Riyad Mahrez, Cole Palmer, Aymeric Laporte leh Ilkay Gundogan te an chhuak vek a, loan hmangin Joao Cancelo, Tommy Doyle leh James McAtee te an chhuak bawk, tun dinhmunah player khel thei an ngah tawk lo.

International break awm leh hmain Premier League match khelh tur pathum an nei, chung zingah chuan Arsenal an tel. Newcastle United nen Carabao Cup khelh tur neiin Champions League khel turin RB Leipzig an tlawh bawk ang.