Goal sur tirtu Barca

Barcelona chuan an zia tak tak an chhuah chho leh dawn ta niin a lang. Xavi hnuaia an insiamthar hnuah La Liga champion an ni thei a, tun season chu Champions League champion nih an tum ngam ang.

Catalan club hian UCL an match hmasa atan an mikhual Royal Antwerp chu 5-0 in an sawp. Loan hmanga an hawh Joao Felix chuan goal hnih khungin, striker ṭha Robert Lewandowski leh Gavi ten an khung bakah Jelle Bataille chuan anmahni lamah a tilut palh bawk.

Tun hnai season hnuhnung pahnihah Barcelona hian Champions League group stage an paltlang zo lo, kuminah erawh bul an ṭan fuh em avangin last 16 an beisei sang nghal hlein a rinawm - Porto leh Shakhtar Donetsk te nen group khatah an awm avangin beiseina a san lehzual phah.