Thil tam tak kan zir - Howe

Newcastle United manager Eddie Howe chuan AC Milan nen Champions League an khelh aṭangin thil tam tak an zir chhuak tih a sawi a, group F match dang an khelh leh tur atan a puih ngei a beisei.

Magpies hian kum 20 hnua a vawi khat nan European football inelna sang ber hi an khel ve leh ta chiah a, season hmasa semifinalist AC Milan khelmual San Siro-ah goal khung lo mah se an chhuah bik lo a, 0-0 in an inhnehtawk.

Premier League club hian ball an chang tlemin goal pawh an chhuah teuh ṭhin hle, mahse, goalkeeper Nick Pope chuan Olivier Giroud leh Theo Hernandez te khung tur chu ṭha zetin a dansak a ni.

Howe chuan, "San Siro-a inkhelh hi a awlsam lo tih chu mi hriatsa vek a ni a, chuvangin fans nei ṭha tak Milan lak aṭanga point hmuh hi a hlu hle. Ka naute pawhin khelmual chhung leh a pawn lamah thil tam tak an zir chhuak tih ka hre chiang.

"Tuna kan tawnhriat hi nakin atana a la ṭangkai dawn," a ti. Milan tan Rafael Leao a hlawhawm thei hle a, mahse mahni goal ven thiam tak Newcastle an chetsual duh miau loh avangin goal a khung thei ta bik lo.