Mbappe hoin PSG an chak

Lionel Messi leh Neymar an chhuak a, caoch thar Luis Enrique kaihhruaina hnuaiah Paris Saint Germain chuan Champions League zinkawng an zawh leh ṭan, forward ṭha Kylian Mbappe leh Achraf Hakimi te goal hmangin Borussia Dortmund 2-0 in an hneh.

Paris khawpuia inkhelah ball chang tam leh inkhel thununtu ni zawk PSG lamin goal khung an harsat, second half tir lamah Mbappe-a shot chu Nicklas Sule-a'n a kutin a lo tawk a, penalty chawiin France captain hian a khung.

PSG coach Enrique chuan, "Player-te khelh dan leh fans chet danah ka lungawi takzet. A tir aṭangin goal khung theihna remchang kan insiam nghal a, second half-ah kan khelh dan phung kan tih danglam hret hnu pawhin inkhel kan la thunun hneh hle," a ti.

Arab sum hmanga siam len an nih hnuah PSG hian France rama nomawi chawi theih hrang hrang an chawi kim a, mahse club neitu lamin an duh ber UCL nomawi erawh an la chawi thei rih lo, coach thar Enrique tan pawh Europe khawmualpuia a chet dan hi a hlawhtlin leh hlawhtlin loh tehna a ni dawn.