Bagan-in Odisha an sawp

AFC Cup-ah Mohun Bagan chuan 4-0 ngawtin Odisha FC an sawp a, Asian football-a club inelna sang ber dawttua an match hmasa berah an chak chiang hle - team pahnihin an neih ṭhat an thawhchhuahpui avangin Thawhlehni zan inkhel hi ISL 'enlawkna' ti pawhin a sawi theih.

Bagan tan Dimitri Petratos chuan goal hnih khungin, Sahal Abdul Samad leh Liston Colaco ten goal khat ve ve an khung bawk a, Odisha lamin a chhanletna tur an neih loh avangin an mual Kalinga Stadium-ah mualpho takin an tlawm.

Kolkata club-in Mizo player an neih chhun Lalrinliana Hnamte chu bench lamah a ṭhu tluan a, Odisha tan Jerry Mawihmingthanga leh Jerry Lalrinzuala ten inkhel bul an ṭan thung.

Odisha hian goal khung beiseiin Isak Vanlalruatfela chu bench aṭangin an luhtir bawk a, mahse, Isak-a hian goal a keng tel bik lo - Odisha tan Jerry Mawia'n goal khung theihna remchang a nei a, mahse, Chanmari tlangval vanneih zan a ni lo.

Group D inkhel dangah Maziya SC chuan 3-1 in Bashundhara Kings an hneh bawk a, an group aṭanga team pakhat chauh an tlang dawn avangin vawi khat chak loh a pawi thui thei.