Champions League-ah Al Nassr an chak

Cristiano Ronaldo khelhna Al Nassr chuan tun season AFC Champions League-a an match hmasa berah hnehna an chang nghal a, khualmualah Iranian club ṭha Persepolis chu 2-0 in an hneh.

Al Nassr hian awlsam tak erawhin hnehna an chang bik lo - goal khung loa chawlhlawk an hman hnu, minute 52-naah Persepolis midfielder Milad Sarlak chuan Ronaldo ke phah a rap fuh a, yellow card pahnihna a hmuh avangin hnawhchhuah a ni.

Saudi club-in player tam zawka an khelh hnuah goal an khung ṭan a, defender Danial Esmaeilifar chuan minute 62-naah an lamah tilutin, Mohammed Qassem chuan minute 72-naah chak nemnghehna a khung leh bawk.

Ballon d'Or vawi nga dawng tawh Ronaldo hian Europe lamah Champions League nomawi panga a chawi tawh a, Asia lamah Champions League nomawi chawi leh a duh ang.

Iran leh Saudi inkar boruak avangin ram pahnih club-te an intawn dawnin neutral ground-ah khelh a ni ṭhin. Mahse, kum sarih hnua a vawi khat nan Iran-ah Saudi club an leng a, Ronaldo a la tel zui.

Mahse, Ronaldo te inkhel hi a hmunah entu an awm lo - kum 2020 khan Persepolis chuan Champions League-a an khingpui tur FC Goa chu social media lamah mawi lo takin an bei a, hei vang hian an khelmuala an match hmasa berah fans tel loa khel tura hrem an ni.