ISL kai thar Punjab FC

Tun season ISL-ah a vawi khat nan I League champion an khel dawn a, Punjab FC an ni - anni hian RoundGlass Punjab FC hming puin I League an hmachhawn a, mahse, ISL-ah hming thlakin Punjab FC tih ringawt an ni ta.

Punjab FC-ah hian Daniel Lalhlimpuia leh Brandon Vanlalremdika te chu Mizo player awm an ni a, India tan pawha vawi hnih lo inlan tawh Daniel-a hian Bengaluru, Chennaiyin leh Odisha tan ISL a lo khel tawh a, tawnhriat a nei sa.

Aizawl FC aṭanga hming chhertu Brandon tan erawh ISL-a a season hmasa ber tur a ni a, East Bengal winger hlui chuan ISL hmachhawn tura an inpeih tawh thu a sawi.

Brandon chuan, "A phurawm tawh khawp mai. ISL khelh hun hi ka nghak rei tawh a, tunah chuan ka nghak chhuak ta. I League leh ISL-a Indian player-te inthlauhna hi sawi tur a tamin ka hre lo a, chutihrual chuan foreigner erawh a dang deuh dawn," tiin Vanglaini a hrilh a, I League aia ISL a hautak tur thu a sawi.

Punjab FC hi I League champion puitu Staikos Vergetis thoin a kaihruai dawn a, kum 47 mi coach hian Indian football a luhchilh hmain Greek club a lo enkawl nual tawh a, ISL-ah a theihna fiahin a awm dawn.