Mizoramin point khat sual chhuak

Hero Junior Girls’ National Football Championship 2023-24-ah nimin khan Mizoram hmeichhe team-in Bihar lakah point khat hlu tak an sual chhuak a, 4-4 in inkhel a tawp. Inelna hi Bhubaneswar, Odisha-ah neih a ni a, Mizoram hi a suttu zawk zel an ni.

Bihar hian minute 20 chhungin goal hnih an khung hman a, Mizoramin Kawrthah tleirawl tleirawl Vanlalrohlui penalty hmangin minute 30-naah siphurh an sut ṭhen. Second half-ah Bihar captain Manisha-i'n a goal hnihna a khung a, 3-1 ni hman mah se Rohlui hmangin minute 60-naah siphurh an sut ṭhen a, Nursery Veng tleirawl Emmy Lalruatsangi hmangin minute 62-naah Mizoramin siphurh an sut zo.

Bihar bawkin goal an khung hmasa leh a, Aaliya hmangin 73-naah an khung. Mizoram an tlawm duh lo a, Serchhip tleirawl Lalsangpuii'n injury time-ah siphurh a sut a, 4-4 in inkhel a tawp. September 22, Zirtawpni tlai dar 3:00 hian Mizoramin West Bengal hmachhawn leh ang.