Hei le - Kolasib an inpeih ta e!

Mizoram Premier League-ah vawiin tlai dar 3:00 hian Kolasib club Project Veng leh FC Venghnuai an intawng dawn a, team pahnih intawnna tur hmun hi Kolasib District Sports Stadium a nih avangin Kolasib mipui an phur tawh hle.

Project Veng FC-in match nga aṭangin point hnih an nei tawh a, vannei se point ruk tal chu nei tawh tur an ni - vawiina an mikhual tur hi an hnuaia team awmchhun Venghnuai an ni a, PFC tan mahni muala point hlawhchhuahna remchang a ni.

PFC manager Joseph Zoremsanga chuan, "MPL-a kan season hmasa ber a ni a, kan naute pawhin tawnhriat an nei tam tawk lo. Tunah chuan a boruak an ngam tawh a, mahni muala khel tur an nih bawk avangin an phur hle," a ti a, point thum hlawhchhuah an tum thu Vanglaini a hrilh.

Hmanah chuan...

'Football Khawpui' inti ngam ngat khawpin Kolasib khawpuiin football an tuipui ṭhin a, Kolasib tui liak, football tui inti chin chuan KFC leh PHE inhalzia te kha lungleng takin an la sawi fo a, Tremendous leh Friends club vanglaite pawh hmanlai an chang zo ta - Ṭumpui field diak kara inkhel hmuhnawm te, Diakkawn field-a hrui pawt chung ngei maia ticket zawrh lai te pawh kha!

Tualchhung footballer Tlanmawia, Mareltea, Dennis-a, Mapuia, Vardinga, Joseph-a, Ni-a, RLT-a, Manunga leh Ramhluna te ho thiamzia kha tun thlengin sawi a la ni ṭhin a, vawiinah chuan Kolasib club ngeiin mahni mualah MPL match an khel dawn - khelmualah pawh phul lem phah a ni tawh a, fans tan pawh kotlanga bet mai loin ṭhutna mumal tak a awm ta.

Tun hmain Kolasib hian footballer ṭha tak tak, PC Lalawmpuia (Tuaitea), Vanlalrova leh Achhuana Vanchhawng te an lo nei tawh - tun hnaiah William Lalnunfela leh Paul Ramfangzauva te ho chu professional footballer an neih a ni a, tun aia tam zawk professional footballer nei turin tualchhung football-in hma a sawn a ngai a, PFC hi a sulsutu an ni.

Mipui an phur

Project Veng manager Joseph-a chuan, "Kan inkhel en turin stadium khat mipui an rawn punkhawm kan beisei. Fans lam pawh an phur a, fans jersey nen min ṭawiawm dawn. Social media lamah pawh kan inkhel tur chungchang an sawi nasa tawh a, kan veng mai ni lo, khaw mipuiin min ṭawiawm dawn," a ti a, Kolasib aiawh an nih thu a sawi - Venghnuai tan Kolasib 'ber kher' a PFC hmachhawn hi thil châkawm a ni bik lo ang.

Kolasib District Football Association secretary Lalliansanga chuan, "Project Veng ṭan turin mipui an inrawt phur a, kan khuaah chuan 3 points ngei kan hmu ang chu, an ti a, an ṭang tlang a ni. Kum 2019 khan MPL hi kan lo thleng tawh a, mahni khaw club an tel tawh avangin tunah boruak a lian zawk," tiin Vanglaini a hrilh.

Project Veng FC hian hun rei tak chu Kolasib football thununin, ro an rel tawh a, tun season-ah MPL hial an rawn inpetkai. Kolasib mipuiten, "Kan khaw aiawhtu," tiin an ṭan rawn dawn a, mahni mualah an khaw club a mualpho an phal lo ang.