Chhinga Veng nge lian Electric Veng?

Zote Toyota MPL10 ṭan hma kha chuan Chhinga Veng leh Electric Veng buk dun hi a rem lo. Chhingcows-in I Day Football nomawi an chawi laiin Electric Vengin group stage an paltlang lo a, team pahnih an inthlau hle.

Vawiin chhun dar 12:00 hian Kolasib Sports Stadium-ah Chhinga Veng leh Electric Veng te hi an inkhel dawn a, match nga khelh tawhah EFC-in point an hmu tam zawk. Player neih dan thlirin Chhingcows buk la rit zawk mah se table-ah a hniam zawk an ni a, Electric Veng erawh hnehna an chang a nih chuan a sang pali zingah an awm tawh dawn.

Season ṭantirh khan C. Lalhriatpuia'n Chhinga Veng training a zawm a, coach Lalsangzuala Hmar hnuaia khel tura ngaih a ni. Amaherawhchu, Hriata hian I Day Football ṭan hmain khelhna hmun a chan tam zawkna tur Electric Veng a zawm a, club tharah hian captain armband a hreng hial.

MPL10-ah Hriata hi a khel ṭha ber zinga mi a ni a, goal thum khung tawhin man of the match-ah vawi hnih thlan a ni tawh. Electric Vengin match nga aṭanga point sarih an hmuh theihna kawngah player pawimawh a ni a, Chhinga Veng tlarhnung tan pawh ven uluk a ṭul ang.

Chhingcows erawh season bul an ṭan fuh lo a, registration fel loh avangin Mizoram Police lakah point thum an chan nghal. Sanga Hmar hoten insiamṭhat harsa an ti a, chutihrualin round 5 khelh zawh meuh chuan an game a ṭha leh tawh.

Captain MS Dawngliana'n hremna a hman zawh tawh avangin a rawn kir leh thei tawh a, Dawngtea a awm chuan Chhingcows goal bawh a na sawt ang. Kolasib-ah Sanga Hmar hote fiahin an awm dawn a, Electric Veng laka an result hian an hmalam hun tur a hril ang.