Kolasib-ah Chanmari an Shabash

Chanmari FC-in champion tumin player ṭha an la khawm a, a rah an seng chho mek. Nimin khan Kolasib-ah Chanmari hian I League Aizawl FC 2-1 in an hneh a, an phu ang ngeiin Zote Toyota MPL10-ah table hmahruaitu an ni leh ta.

Nimin Kolasib inkhelah tualchhung football-in hma a sawn tih a lang a, football hmuhnawm pahnih chhawp chhuah a ni. Chanmari FC-in game nung ṭha tak an khel a, Chanmarians-in khelmuala an hla pui 'Baluram ka badan' an sak hun a hla tawh lo niin a hriat theih a, khelmualah 'Shabash' an chho hle dawn e.

I Day Football-ah khan Aizawl FC-in inbuatsaihna nei ṭha Chanmari FC an hneh nghal a, K. Malsawmkima kaihhruai CFC an dinna ngaiah an la ding. Chak turin thawhrim an thupui a, Kolasib an pan hmasa ber a, inpuahchahna ṭha nen I League club tum nawn leh ngatin hnehna an chang.

Chanmari tan Lalkhawpuimawia'n (Mapuia) a theihna a lantir a, minute 43-naah Kelkang striker hian angle zim tak aṭangin a ke vei lamin kawh zetin a pet lut. Aizawl FC-in an chhanglet nghal a, minute khat hnuah vei lam aṭanga Lalrempuia cross chu R. Ramdinthara'n (Tharpuia) a tauh goal.

Player theihna a sang a, inkhel pawh a nung ṭha hle. Second half ṭantirhah R. Laldanmawia ball petin Rempuia kut a per a, Chanmariin penalty hmuin Sialhawk Express hian minute 51-naah a pet goal. Aizawl FC-in na takin nawr an tum a, amaherawhchu Chanmariin Zothanmawia (T. Mawia) an kawl a, keeper tawnhriat nei ṭha hi a talbuai duh lo.

T Mawia hi a vanneih ṭum ni se goal khung thei a ni hial zawk a, a ball pet na tak chu goal-ah lut mah se pawmsak a ni lo. Laltlanzova offside vanga pawm loh niin a lang. Champhai Kanan tlangval Zozoa hi a hmuhnawm a, a goal khung ngei tura ngaih chu keeper Joel Lalramchhana'n a dansak.

Chanmari FC-in point 14 hmuin pakhatna an ni a, Aizawl FC erawh point an hmuh loh avangin palinaah an tla thla. Vawiin inkhel a zirin I League club hi palina aṭangin an la chhuak thei bawk.