Nuam ti takin Arsenal an chak

Arsenal chuan Champions League khel turin an ṭha tawk a ni tih an lantir a, football mawina hrang hrang pho lang chungin an mikhual PSV Eindhoven chu 4-0 in an sawp - Mikel Arteta naute an hmuhnawm takzet.

Nilaini zan UCL group stage inkhelah Gunners tan Bukayo Saka, Leandro Trossard, Gabriel Jesus leh captain Martin Odegaard ten goal khat ṭheuh an khung a, mikhual Dutch team lamin a chhanletna an nei lo.

Champions League lamah Arsenal hi eng ang taka ṭha nge an nih chu sawi huai a la harsa. Amaherawhchu, kum ruk hnua an kir leh dan erawh a hmuhnawm a, an tlangnel tawhna leh an chet hrep tawhna hnu ang maiin an mikhual lo a ni.

Group B inkhel dangah French Ligue 1 club Lens leh Sevilla te chu 1-1 in an inhnehtawk. Lens hian kum 20 hnua Champions League an khelh lehna hmasa berah point khat an hlawk chhuak.

Laipui a puak

Mikel Ateta-a'n Aaron Ramsdale aiin David Raya chu si ban nghak turin a thlang nawn a, thutlukna a siam sual lo - Spanish goelkeeper hian goal a venhim ṭhat bakah ball a sem chhuak ṭha bawk, a hna thawh tur chin a tlin hle.

Ruah a sur chungin Emirates Stadium chhung boruak a lum hle a, thawm a na helh helh hle. Minute riatna lekah Saka chuan Odegaard-a shot PSV keeper lo danper a khung nghal, thawm chu ring hem hem tak a ni.

Gunners an hmuhnawm zui - Saka ball pek dawngtu Trossard chuan box pawn aṭangin goal kilah a khung, a thiam dan takin a pet lut mawi hle. Chawlhlawk hmain Jesus-a'n goal thumna khungin chak tur a chiang tawh.

Second half-ah hahdam deuh zawkin khel mah se North London club an chungnung tho, captain Odegaard-a pawhin a thiam dan takin, hla deuh tak aṭangin goal kilah a pet lut a, nuamsa takin point thum an hlawh chhuak.

Indah ṭha

Chak tur a chian hma avangin Arteta tan player dahṭhat a ngai - Pathianni zanah Tottenham Hotspur nen North London derby an khel dawn a, tun season league match an khelh tawh china hautak ber tura ngaih a ni.

Saka, Jesus, Trossard, Declan Rice leh Oleksandr Zinchenko te lakchhuah an ni a, substitute bench aṭangin Emile Smith Rowe, Takehiro Tomiyasu, Jorginho, Fabio Viera leh Reiss Nelson te an la lut thei, squad an nei chhah ta hle.

Arteta naute hian Everton lakah fiahna pakhat chu an paltlang tawh a, tunah UCL-ah result ṭha an neih chhunzawm avangin Tottenham mikhual an huphurh hran lo mai thei, tun hnaia Spurs khelh dan thlir erawh chuan thil awlsam a ni lo ang.

Rimawi chu

Champions League khelh dawnah rimawi (music) play ṭhin bik an nei, kum ruk hnuah Arsenal hian an hre leh chauh - training an neih laiin coach Arteta chuan a naute a ngaihthlak tir niin an sawi, stadium chhunga an ngaihthlak pawhin an rilru a khawih tih a hriat.

Arteta chuan, "Si li faiin kan chak a ni satliah lo a, kawng engkimah kan khel ṭhain a fuh em em vek mai a ni. PSV lamin min beih let lai pawhin kan nghing lo, khatiang kha ka duh dan a ni," tiin a sawi a, a naute khelh danah a lungawi hle.

Dutch league Eredivisie hmahruaitu PSV hi an match hnuhnung 26-ah an tlawm miah lo, mahse Arsenal lakah erawh a tir aṭangin team nem zawk an ni a, goal li aia tam an chhuah lo chu an vannei zawk hial.