Chawnpui an ṭha, Police an fei

Kolasib-a Zote Toyota MPL10 match hmasa berah Chawnpui FC leh Mizoram Police te 2-2 in an inhnehtawk a, Lalrindika Hmar leh Lalbiaksanga Colney enkawl ten football hmuhnawm tak an pho chhuak. MPL10-ah team ṭha fal an awm lo tih a lang a, team dinhmunin a zir em avangin inkhel a hmuhnawm chho zel ang.

MPL champion lai Chawnpui hian Lalbiakzuala hmangin ṭum hnih hma an hruai a, Police-in Lalrinzuala leh F. Lallawmkima te hmangin an sut ve ve. Team pahnih chakna chance an nei ve ve a, point khatah an lungawi ve ve a ṭul thung.

Chhun pachanga inkhel a ni nachungin inkhel a nung ṭha a, chance pawh a tam. Police lamin inkhelh ṭantirh lamah an nawr ṭha. Amaherawhchu, Chawnpui lamin goal an khung hmasa a, midfielder BZ-a'n minute 21-naah goal hmahruai a khung.

Chawnpui vanneih ṭum ni se; VL Thanga, Tea Chinzah leh Biaknia te hmangin khung belh thei an ni a, hun ṭha an bawhpelh. First half-ah 1-0 a ni a, second half-ah Malsawmfela te rawn lutin Police goal bawh a na sawt. Minute 63-naah Lalrinzuala'n corner kick aṭangin a tauh lut a, 1-1 a ni.

Mahse, Chawnpui bawkin hma an hruai a, goalkeeper F. Lalmuanawma tihperna zawnah tak BZ-a lo awmin Chawnpui midfielder hian minute 72-naah goal hnihna a khung. Police an tlawm lo a, Lalnunsanga'n (Talea) mual vei lamah Biaknia bumin a cross ball chu F. Lallawmkima'n goal-ah a chantir a, 2-2 a nih huah Police dinhmun a ṭha ta zawk.

Police hian Lalhmunmawia hmangin chakna goal an khungah an inngai a, amaherawhchu Malsawmfela tauh lo tauh pial lehtu Ahmuntea hi a offside. Inkhelh ṭantirh lamah Chawnpui dinhmun ṭha zawk mah se hun a tawp meuh chuan Police tawnhriat neih ṭhat a lang a, 2-2 in inkhel a tawp.