Bayern an chak : Man United an tlawm leh tawh

Bayern Munich leh Manchester United inkhel chu rinlawk ang ngeiin a hmuhnawm a, Allianz Arena-a inkhelah goal sarih ngawt lutin Bavarians 4-3 in an chak. UCL group A inkhel dangah Copenhagen leh Galatasaray te 1-1 in an inhnehtawk thung.

Harry Kane a telna Bayern goal bawh natzia hmuhin a awm a, Erik ten Hag-a kaihhruai Man United erawh a zawn zatin vawi thum an tlawm ta. Man United hian match hnuhnung pathumah goal 10 an chhuah a, an tlarhnung a pawp tih phat rual a ni lo.

Tuchel a tel lo

Bayern coach Thomas Tuchel chu match khat hrem a nih avangin mual sirah a naute a ho thei lo. Thutlukna erawh Tuchel-a siam a ni tho a, Harry Kane-a'n bul ṭanin Thomas Muller erawh bench-ah dah a ni. Assistant coach Zsolt Low-a hoin Bavarians hi an inlan.

Man United-in 4-2-3-1 formation an rawn hmang leh tawh a; Antony leh Jadon Sancho ten khelmual pawn buaina an neih zarah Facundo Pellistri-a'n mual sirah bul a ṭan ve bawk. Player dang 10-te erawh Brighton hneh lotute tho kha an ni a, Pellistri hi Scott McTominay aiah a lut thung.

Onana a chesual

Bayern lakah mikhual team-in bul an ṭan ṭha zawk. Cristian Eriksen-a'n Konrad Laimer ball pet ṭhat tawk loh chang fuhin a cross ṭha zet chu Pellistri-a'n hnai tak aṭangin a khung lo, hemi per changtu Eriksen-a pet pawh keeper Sven Ulreich-a'n a dang leh bawk.

Mual vei lamah Marcus Rashford a hmuhnawm chhunzawm a, goal erawh a sual chhuak thei lo. Bayern-in minute 28-naah Andre Onana an fiah a, United keeper hian Leroy Sane ball pet chu a ke zawnah kal mah se a chhuah! David de Gea aia thlan Onana a chesual - a hna ber goal venhim a ti lo.

Bayern an phur phah a, Brighton laka mualpho United an la insiamṭha lo tih a lang bawk. Rawlthar duhawm Jamal Musiala-a'n Diogo Dalot a ching phar hnuah a ball pek chu vengtu nei lo Serge Gnabry-a'n goal kilah kawh zetin a pet lut. Seagulls an hmachhawn ṭum ang thoin United midfielder-ten centre back an la thlawp ṭha lo.

United an beidawng bik lo a, Sergio Reguilon leh Casemiro hmangin Bayern tlarhnung an ṭhiat a, Pellestri-a'n a khawih fuh hman lo thung. Sane-a'n goal khung belhna remchang a nei leh a, goal zawnah a kal lo bawk.

Bayern an la ngai

Bayern Munich hian game hmuhnawm an khelh ṭumah pawh goal an chhuah leh ṭhin. Man United-in second half ṭantirhah Casemiro leh Rashford te thawhrah sengin Hojlund-a'n minute 49-naah club tana a goal hmasa ber a khung a, Danish striker hian theihna sang tak a nei tih a lang bawk.

Man United-in beiseina nei hman mah se an chesual lehnghal. Box chhungah Dayot Upamecano ball tauhin Eriksen-a kut a per a, VAR hmanga en hnuah penalty pek a ni. Harry Kane rawn pen chhuakin minute 53-naah Kane-a'n a khung.

Bayern-in na takin an nawr zui a, Sane-a'n goal ban a pet per. Kane-a ball pet Onana-a'n a dang. Sane leh Kane te chance siamtu hi Musiala a ni a, hemi hnu hian player pahnih bakah Eric Maxim Choupo-Moting ten chance an nei a, keeper Onana-a'n a hna a thawk ta thung.

Minute 88-naah United midfielder Casemiro-a'n Rashford hnen aṭanga a ball hmuh chu box chhungah nalh taka lalutin buai deuh nuaihin siphurh a sut ṭhen. 3-2 a nih leh tak avangin Bayern dinhmun a derthawng a, rawlthar duhawm Mathys Tel rawn inlarin Joshuam Kimmich ball pek fing chu ṭha zetin a khung.

Bayern an khel ṭha zawk a, team pahnih an inhlat tak tak thei lo. Hun tawp hma chiahin United captain Bruno Fernandes-a'n freekick aṭangin a khung a, 4-3 in inkhel a tawp. Bavarians-in point thum an hlawh a, lawmna tur ni mah se goal thum an chhuah avangin an lawm a kim lo ang.

"Kan phu ang ngeiin kan chak. UCL-a chak hrim hrim hi a hlu a, Man United laka chak hi a hlu. 3-1 a nih khan inkhel kan ti thi thei lo a, mahse kan chetsual apiangin kan tho chhuak ṭha zel."
- Thomas Tuchel,
Bayern Munich manager

"Munich-ah goal thum kan khung thei a nih chuan point khat tal kan hlawh chhuak tur a ni a, mahse kan hlawh chhuak tlat lo. Kan inenfiah a ngai a ni. Tunah chuan kan tan inkhel zawng zawng a pawimawh a, vanneihna pawh kan sual chhuah ve a ngai. Tumahin min pui dawn lo a, kan kutah engkim a awm."
- Erik ten Hag,
Man United manager