Pro Fight tel tur mi 395

Tualchhung boxing inelna lian Tata SK 612 LPS Pro Fight-a tel tumin boxer 395-in lehkha an theh lut. Nilaini kha hming pek hun tawp a ni a, a tawp ni hian welterweight champion lai C. Lalhruaitluanga leh vawi nga champion ni tawh NT Lalbiakkima'n hming an pe lut a ni.

Champion lai panga zingah bantam-a insawn tumin fly champion Laldinsanga a tel dawn a, nikuma best boxer Ramthar Lunglei tlangval hian professional vawi nga khel tawhin hnehna a chang vek a, tun tumah pawh ngaihven hlawh tur zinga mi a ni.

Bantam champion Lalrinngheta'n light title chuh a tum ve thung a, kum 21 mi Tuipui boxer hian nikum Pro Fight atangin professional a luhchilh a, vawi thum inhnek tawhin a chak vek a ni.

Hruaia'n welter kalsanin middle-weight-ah chona thar hmachhawn a tum a, kum 25 mi Chawngtlai boxer hian professional-ah hnuhma tha tak neiin vawi ruk a khelh tawhah chak vekin mi pathum a knockout a ni.

Champion lai zingah featherweight title kawltu Lalrosangzuala leh light champion Vanlalawmpuia'n an tel dawn lo. Rosanga hian mimal hna avangin harsatna a nei a, Awpa'n light title humhum tum mah se a rilru thlakin WBC India title chuh dan kawng a dap.

Kum 2019 middleweight champion C. Lalduhawma'n middle champion nih leh ngei a tum bawk a, nikum khan middle telh a nih loh avangin kum 26 mi Ramhlun South boxer a tel lo, professional boxing a khelh tawh vawi hnihah knockout-in a chak ve ve a, Hruaia nen an intawng thei dawn a ni.

Kum 2015 bantam champion HC Lalramfela'n weight hrang pahniha champion tumin fiahna a hmachhawn leh dawn a, nikum khan light title fight-ah Awpa a hneh lo a, kuminah bantam champion Rinngheta nen light champion nih tumin weight khatah an awm dun thei dawn a ni.

Kum kal ta khan boxer 211 an tel a, kuminah 395 inziak lutin kar leh Thawhlehni zing dar 8 aṭangin LPS Huan, Falkland Vengah an hriselna endikin an inbuk dawn a, September 30 inrinniah LPS Office, Zarkawtah fixture tar chhuah tur a ni a, October 2-ah ṭan a ni ang.