Hliam vangin club kan buai - Pep Guardiola

Manchester City boss Pep Guardiola chuan hliam an kawl nual avangin club an talbuai thu a sawi - City hian Thawhlehni zan khan Champions League-ah Red Star Belgrade chu 3-1 in an hneh a, mahse, bench-ah player paruk chiah (goalkeeper tiam lohin) an dah thei.

He inkhelah hian player pawimawh Bernardo Silva a inhliam zui a, Pep chuan a player hi, "Kar engemaw zah chhung a chawl ang," tiin a sawi a, player hliam Kevin de Bruyne, Jack Grealish, Mateo Kovacic leh John Stones an nei sa bawk!

Spanish manager chuan, "Buaina lian tak kan tawk mek a, mahse, chhuanlam atana hman erawh ka tum lo - a lo thleng ve a ni mai. Kan player neih ang ang te nen theihtawp kan chhuah zel dawn a, chu rilru chu kan put chhung chuan a ṭha a ni mai.

"Player pawimawh tak tak inhliam panga kan nei a, rei tak an tel loa khelh erawh a harsa dawn," a ti - City hian nipui transfer-ah Riyad Mahrez, Cole Palmer leh Aymeric Laporte an hralh a, captain Ilkay Gundogan chu a contract hmang zoa chhuakin, Joao Cancelo chu loan-in an chhuahtir a, rawlthar Tommy Doyle leh James McAtee te loan-in an chhuak bawk.

Hetihrual hian City hian nipui transfer-ah player lakluh nan pound maktaduai 200 chuang an seng tho a, Pep erawhin a la duhkhawp lo! Spanish coach hlawhtling chuan, "Player 55 neih theih a ni lo a, an man leh hlawh ringawtah buaina a tam lutuk ang. Club-in sum kan nei lo thuai mai ang," a ti a, duhthusama squad tihchhah theih a nih loh thu a sawi.

Pep chuan a player-te hliam dinhmun sawi zuiin, "Vanduaithlak takin Kevin hi a chawl rei dawn a, John pawh a la rei dawn. Kova a lo kir hnai mai thei a, Jack hi kar khat emaw ni 10 hnuah a lo kir thei mai thei," a ti.

Premier League match nga khelh tawha la chak vek Manchester City hian Inrinni zan dar 7:30-ah league match khel turin Nottingham Forest an lenchilh zui dawn a, League Cup third round-ah Newcastle United chu September 28-ah an mikhual zui ang.

September 30-ah Wolver-hampton Wanderers lenchilh zuiin, October 4-ah RB Leipzig (Champions League) an lenchilh ang a, October 8-ah Arsenal khelmualah an leng leh ang - international break hma chu kar khat chawlh nei tling loin an inkhel char char dawn tihna a ni.