Mizoram tan beisei a la sang
Junior Girls’ National Football Championship 2023-24-ah Mizoramin vawiin tlai dar 3:00 hian West Bengal an hmachhawn dawn. Inelna hi Bhubanewsar, Odisha-ah neih a ni a, Mizoramin Bihar laka point khat hlu tak an hlawhchhuah avangin beiseina sang tak an la nei nei a ni.
Susan Ralte (manager) leh Tochhawng Ruata (coach) te kaihhruai Mizoram tleirawlte hi Aizawl bakah Chhingchhip, Kanghmun, Kawrthah, Khawzawl, Ropuichhip, Saitual, Serchhip, Thekpui, Tlungvel leh Tualte aṭanga kalkhawm an ni.
RG Stadium-a inbuatsaihna an neih ṭhat rah an seng a, match hmasa berah an vannei. Bihar nena an inkhelh ṭum hian minute 90-naah 4-3 a la ni a, injury time-ah Lalsangpuii Sailo chuan box pawn chiah aṭangin goal kilah tak a dah a, 4-4 in an inhnehtawk.
Mizoram hian goal khung lo se chuan match hnih khelh hmabak la awm mah se beiseina a tlem khawp ang. A chhan chu group khat aṭangin team pakhat chauhin semifinal an luh dawng vang a ni.
Inkhel dangah Jharkhand-in West Bengal 6-2 in an sawp a, Mizoram tana semifinal beiseina a awm chhunzawm nan West Bengal hneh ngei hi a ṭul dawn. Mizoram coach Tochhawng Ruata chuan, "Natural grass a ni a, kan nauten khelh an harsat deuh. Match hnihnaah chuan kan insiamrem theih tawh ka ring a, chak ngei kan tum ang," tiin Vanglaini a hrilh.