India chakna Chhetri

Asian Games 2023 neih laia football inelna huangah, nimin tlai khan India chuan hun tawp dawna captain Sunil Chhetri-a penalty chhuih luh hmangin Bangladesh chu 1-0 in an hneh hram.

Xiaoshan Sports Centre, Hangzhou-a inelna neihah India hian ball chang tamin inkhel thunun mah se goal khung an harsat, inkhel bul ṭantu zingah Mizo tlangval Lalchungnunga a tel a, khel chhe lo mah se goal erawh a pai tel bik lo.

Ram pahnihte an inhnehtawk mai dawn niin a lang hman, hun tawp hma minute nga chauh awm tawhah Chhetri-a chuan India tana a goal 93-na khungin point thum a hlawh chhuah pui a ni.

Bangladesh nen hian vawi 36 an intawnna niin, record nei ṭha zawk India hi vawi 19 an chak tling ta chiah a, vawi 12 inhnehtawkin ṭum nga chu Bangladesh an chak zawk.

India hian an match hmasa zawkah China chu 5-1 ngawtin an ngam lo. An match pathumna atan September 24, Pathianni tlai dar 5:00 hian Myanmar nen an inhmachhawn leh ang.

Nizan khan Group A inkhel dangah China leh Myanmar an inhmachhawn a, result erawh kan hre hman ta lo a ni.