Union Berlin lakah Real an chak hram

Santiago Bernabeu-a hnehna chang turin Real Madrid-in vanneihna leh Jude Bellingham an mamawh a, an mikhual vantlang Union Berlin chu hun pek belha Bellingham goal hmangin 1-0 in an hneh hram.

Season hmasa Champions League semifinalist Real hi harsatna nei loa hnehna chang mai tura beisei an ni. Mahse, an beisei ang ngawtin thil a awlsam bik lo a, goal hmu turin injury time an nghah thlen a ṭul.

Real boss Carlo Ancelotti chuan Real a pan hnua goal khung bansan hleithei lo Bellingham chu number 10-ah a dah a, English midfielder hian tlarhma lamah hna thawk tam lehzual se a duh tih a lang - a beisei ang ngeiin Bellingham hi a hmuhnawm lehpek hle.

Mahse, Real hian a pawimawh ber goal khung erawh an harsat. Joselu chuan Bellingham siamsak chu uiawm takin a tauh goal thei lo a, vawi hnih ngawt post an tihper bawk.

Joselu pawh a vanneih zan ni se, scoresheet-a a hming ziak kai tur a ni. Mahse, Union keeper Frederik Ronnow chet ṭhat zan a tawng a, Danish keeper hian a tauh goal ngei tur nia lang chu a dansak - woodwork a per zui.

Real tan Rodrygo leh Luka Modric ten chance duhawm an nei bawk a, mahse, anni pawh an vanneih zan a ni lo. Ronnow chuan, "Ka chan a ni," ti niawm fahranin a lo dansak zel a, Real tan goal khung a harsa takzet.

Mahse, hun pek belh a ni a, a vawi khat nana Champions League kheltu Union Berlin tan Ronnow a ṭang tlang zo lo - hun pek belh minute linaa Federico Valverde-a shot chu lo dang mah se a per lehlam chu Bellingham-a ke bulah a tla a, English midfielder hian harsatna nei loin goal-ah a chantir.

Hun tawp thlengin goal dang a lut tawh lo a, Real an chak - kum 20 mi Bellingham-a'n Real tan match rukah goal ruk khungin assist vawi khat a nei ta a, Spanish club hian a man atana euro maktaduai 100 chuang an lo seng ngam kha tifuh an inti tawlh tawlh ang.