Perisic-a tan season a tawp

Tottenham Hotspur winger Ivan Perisic chuan a khup ding lamah hliam na tak a tuar a, Croatia international hi tun season-ah chuan a inlan a beiseiawm tawh lo - kum 34 mi a ni ve tawh a, a professional footballer career chu zawi muangin a mangṭha, tiin a sawi theih.

Perisic hi a khup hliam hi zai a ni dawn a, tun season a inlan theih tawh loh chuan Spurs kawr hain kan hmu tawh kher lo mai thei. Kum 2022 khan Perisic hian Inter Milan aṭangin Spurs hi a zawm a, kum hnih atan contract a ziak.

Nakkum July-ah a contract a hmang zo tawh dawn a, London hmar veng club hian contract thar an zawrh te a nih ngawt loh chuan Spurs tan a inlan hmel tawh lo - player inhliam lai chu contract an zawrh a rinawm chiah lo bawk!

Croatia tan vawi 129 inlana goal 33 khung thei Perisic hian French club Sochaux aṭanga a professional zinkawng zawh ṭanin Roeselare, Club Brugge, Borussia Dortmund, VfL Wolfsburg, Inter Milan leh Bayern Munich tan a lo khel tawh.

Bayern-ah 2019-20 season kha loan-a khelin, treble champion a nihpui a, Bundesliga, DFB-Pokal leh Champions League-ah te nomawi a chawipui. Inter-a a kir leh hnu a season khatnaah Serie A nomawi chawi zuiin, a hnu season-ah Coppa Italia leh Supercoppa Italiana nomawi a chawipui bawk.

Borussia Dortmund tana a khelh laiin Bundesliga leh DFB-Pokal nomawi pakhat ve ve a chawipui a, VfL Wolfsburg chu DFB-Pokal leh DFL-Supercup-ah nomawi a chawipui bawk - a sulhnu hi inchhuanpui tham a ni.

Croatia tan World Cup final kum 2018 khan khelin, nikuma pathumna an nih pawh khan a la tel a, UEFA Nations League 20222-23 season-ah pahnihna an ni. Khelmualah a hmel kan hmu zui lo a nih pawhin lawm takin football khawvel a mangṭha thei ang.

Perisic-a khelhna Spurs hian season bul an ṭan ṭha hle -coach thar Ange Postecoglou kaihhruaina hnuaia league match nga an khelh tawhah vawi li chakin, vawi khat draw an nei a, match ngaah hian Perisic hi inlan vek mah se bench aṭanga luhtir vek a ni thung.