Turkey-in coach Kuntz an ban

Kum hnih zet Turkey national team a enkawl hnuah Turkey chuan an ram mipa football team enkawltu Stefan Kuntz chu an ban a, Turkish Football Federation chuan an coach nen chuan inhuatna leh lawm lohna engmah awm lo a, ṭha taka an inṭhen thu an puang.

Turkey hian an friendly match hnuhnung berah Japan chu 4-2 in an ngam lo a, inkhelh zawhah Kuntz hi ban mai rinna lian viau mah se Turkish FA chuan hei hi an pha - tunah erawh an ban ta tho!

Germany striker ṭhin Kuntz hian kum 2017 leh 2021 khan German Under-21 chu European Championship-ah champion nomawi a chawipui a, a hnathawh ṭhat hi hmuin Turkey chuan September 2021 khan an coach turin an la lut.

Kum 60 mi coach hian match 20-ah Turkey hi kaihruaiin, vawi 12 hnehna a chanpui thei a, mahse, World Cup 2022-ah khan a inpetkaipui zo lo - Turkey hian World Cup 2002-ah khan pathumna dinhmun an hauh a, mahse, hemi hnuah hian football inelna ngaihhlut hlawh berah hian an inlan leh tawh lo!

Kuntz hian friendly match-a Japan an hneh loh hnu lawk khan amah chu dem bik vek tur a nih loh thu a sawi a, a player-te chuan thawhrim lehzual an mamawh thu a sawi - a tawpah erawh amah berin a tuar ta.

Tun international break-ah khan Japan-in national team coach pahnih chu an bansak a ni ber - Germany chu 4-1 ngawta an sawp hnuah German team hian an ram coach Hansi Flick an ban a, a hnuah Turkey hneh zuiin, Turkish Football Federation-in an coach an ban ve leh a ni.