Warnock-a'n Huddersfield a chhuahsan

Nilaini zan khan Championship match-ah Huddersfield Town chuan 2-2 in Stoke City an inhnehtawkpui a, Huddersfield boss Neil Warnock-a tan Terriers (Huddersfield sawina) coach ni chunga a match hnuhnung ber a ni nghal.

Huddersfield tan Matty Pearson chuan goal hmahruai khungin, Stoke chuan Daniel Johnson leh Ben Wilmot hmangin an chhang leh a, 2-2 in an inhnehtawk.

Warnock-a'n Terriers a mangṭha zui. Kum 74 mi coach hian November 2021 khan Middlesbrough chhuahsanin, April 2022-ah coaching a chawlhsan thu a puang a, mahse, February 2023 khan Championship relegation zone-a awm Huddersfield Town chhan chhuak turin a lo kir.

Fan-te beisei ang ngeiin 1993-95 inkara a lo enkawl tawh Huddersfield a chhanhim a, kum khat dang cham turin contract ziak zui mah se season laklawhah a chhuahsan leh ta. Warnock chuan a chhuah chhan chu a chawlh dawn vang a nih loh thu a sawi a, a hriselna dinhmun a ṭhat thu a sawi bawk.

Terriers chief executive Jake Edwards chuan, "Hun rei zawk team enkawl thei tur coach ruat kan duh a ni," tiin hmachhawp thar siam an duh thu a sawi a, Warnock hi zahna nen Huddersfield ṭantute chuan ropui takin an thlah.

Premier League aṭanga tla hlim Leicester City chuan 2-0 in Norwich City an hneh bawk a, Kelechi Iheanacho (penalty) leh Kasey McAteer ten goal khat ve ve an khung - league match sarih an khelh tawhah vawi nga chakin, vawi khat an tlawm tawh.

Foxes hi Championship table-ah pahnihna ni mekin, hmahruaitu Preston North End chu point khat chiahin an phak lo - season tharah Premier League-a kir leh ngei an tumruh hle.