Zaninah ISL match awm dawn lo

India rama football inelna ngaihhlut hlawh ber Indian Super League chu nizan khan khelh ṭan a ni a, match hmasa berah Kerala Blasters leh Bengaluru FC inkhelin, an result erawh kan hre hman lo.

Ruahman dan chuan zaninah hian ISL match awm zui tur a ni a, FC Goa leh Hyderabad te inkhel tur an ni. Mahse, Asian Games khelh a nih avangin ISL enkawltu Football Sports Development Limited (FSDL) chuan club pahnih fixture hi a sawn.

AIFF nen inbiak rawnna neih a nih hnuah FC Goa player Sandesh Jhingan leh Hyderabad FC player Chinglensana Singh te chuan India squad an zawm a, club pahnih player pawimawhten India Under-23 squad an zawm a ṭul avangin FSDL chuan an match hmasa ber khelh hun chu a sawnsak ta a ni.

Asian Games football-ah hian India mipa team sulhnu hi a nep lo hle - kum 1951 leh kum 1962-ah khan gold medal an hlawh chhuak a, kum 1970-ah bronze medal lain, kum 1958-ah palina an ni thung.

Hetihlai hi Indian football vanglai niin, 1951 final-ah hian Iran chu 1-0 in an hneh a, 1962 final-ah hian South Korea chu 2-1 in an hneh thung. Gold medal an lak vawi hnih hi Indian coach ropui Syed Abdul Rahim kaihhruaina hnuaia an lak ve ve a ni.