Kane lak let theihna dan kan nei - Spurs Chairman

Tottenham Hotspur chairman Daniel Levy chuan nipui transfer-a Bayern Munich lama an chhuahtir tak Harry Kane lei let theihna dan an neih thu a sawi a, mahse, chiang tak erawhin a sawi fiah lo thung.

Spurs hian German champion hnenah hian Kane hi pound maktaduai 100-in an hralh a, Levy hi Tottenham fan-te chuan Kane lei let theihna dan an neih leh neih loh an zawt a, "Nei tehreng mai," tiin a chhang - a bak erawh a sawi lo.

Kane hian Spurs a chhuahsan dawn khan fan-te thlahna thu a sawi a, London club-a a kir dawn leh dawn loh chungchangah thuchiang a sawi duh rih bik lo a ni.

English striker chuan, "Kan hma hunah eng nge thleng dawn kan hriat loh avangin hei hi inmangṭhana a la ni lo. Hei hi chu in hnena lawmthu sawina mai a ni," a ti a, Suprs legend hi fan-te chuan an hnena kir turin an la beisei ve reng.

Kum 30 mi Kane hian Spurs tan match 435 khela goal 280 khungin London club hi a chhuahsan a, mahse, a pawimawh ber nomawi a chawipui lo.

Bundesliga lamah pawh English striker hi a tlangnel nghal viau a, league match li an khelh tawhah goal li khungin, a team hi a la tlawmpui lo a ni.