Uain ṭha mi Aritz Aduriz-a'n football a mangṭha ta

"Football chuan i hawisan hmain a hawisan ang che tiin ka lo sawi fo tawh ṭhin a ni," tiin Aritz Aduriz chuan hliam vanga inkhelh a chawlhsan thu a puang ta a, kum 39 mi striker chawlhna hian football ngainatute thin a ṭhawng a ni. 

Athletic Bilbao striker hi a khel bawr hliam vangin zai a ngai dawn a, a kum a tam tawh bawk avangin Spanish striker tan top level-a inkhelh chhunzawm zel chi niin a lang ta lo. 

Aduriz chuan, "Vanduaithlak takin ka taksa chuan chawl tawh mai turin min rawn a ni," a ti a, kum 35 leh ni 275 mi a nihlaia Spain tana goal khung thei upa ber record siamtu hian football a mangṭha ta. 

Aritz Aduriz hian footballer ṭhenkhat ang lo taka danglamna a nei a, chu chu a larpui pawh a ni - kum 30 a pelh tawh lamah a lar ve ṭan chauh.

Kum 39 mi Aduriz hian a naupan laiin football khel ve ṭhin bawk mah se a la thutak ngai lo a, tlang lawn, tuipuia leu kual (surfing) leh vura tawlh (cross-country skiing)-te chu a tuipui a ni a, amah ngeiin, "Footballer ka nih ka ring ngai lo," tiin a sawi.

Mahse, infiamna lama theihna nei sang tak Aduriz hi football-ah pawh a thiam pawl a ni a, a naupan laiin an khaw youth club Antiguoko a zawm a, he hmunah hian inkhelh thiam vanga khawvel hriat hlawh ni ta  Xabi Alonso leh Mikel Arteta-te nen an khel ho.

Aduriz-a nu leh pa hi an fapain football a khel chu an lawm lo a, surfing lamah kal se an duh! Aduriz chuan, "Ka nu  leh pa hian infiamna ngaina mah se football lama ka kal an remti lo a, club zawm ka dil ngial hnuah surfing aia dah pawimawh lo tura min hrilh chungin an phal ve ta a ni," a ti!

Mahse, Aduriz hian a ṭhiante angin hriat a hlawh lawk lo -  Real Sociedad-in Alonso an la a, Barcelona lamin an youth team-a khel turin Arteta an la bawk. Aduriz erawh second division club Aurrerá de Vitoria-ah a kal a, an inthlau hle. 

Aduriz hi kum kua mi lek a nih laiin Spain national cross country championships-ah patling rual nen an inel chungin pahnihna a ni thei a, a nu leh pa ten football lama kal an phal lo kha thil awm lo a ni hran lo. 

Football-ah lah mi angin a kalkawng a tluang lo em em a, Spain-a club ṭha ber berin a ṭhiante an rim laiin kum 19 mi a nih khan Athletic Bilbao youth team a zawm ve chauh - reserve team tan kum hnih a khelh hnuah kum 2002 khan senior team tana a match hmasa ber a khel. 

German coach ropui Jupp Heynckes chuan Bilbao tana a match hmasa ber hi a khelhtir a, Xavi, Carles Puyol leh Juan Román Riquelme-te ho awmna Barca hmachhawnin 2-0 in an tlawm. 

Senior team tana a season hmasa berah Aduriz hian season tluanin minute 54 chiah a khel ve a, season tharah third division club Burgos lamah loan-a kaltir a ni zui. 

Kum 9 mi lek nia cross-country skiing-a Spain number 2 ni thei kha football lamah chuan kum 22 a tlin hnu pawhin an ram third division club tan a khel ve chauh a, nu leh pa tan chuan duthlang sual an fapa tal vel lai chu rilru na taka en mai loh chu tih tur a tlem hle. 

Mahse, Aduriz erawh a beidawng ve lo. Burgos tan match 38-ah goal 16 a khung a, second division club Real Valladolid-in an club tana khel turin an lalut. Kum khat leh a chanve a khel hman tihin match 52-ah goal 22 a khungsak a, a hmangaih hmasa Bilbao bawk an lo lang leh ta. 

Aduriz tan Bilbao hnar chu thil theih a ni lo a, a ngaihtuah tel loh erawh hetihlaia striker ṭhangduang leh hmuhnawm  Fernando Llorente chu Bilbao-ah a awm tih hi a ni. 

Coach  Joaquín Caparrós-a hnuaiah a duh ang minute a chang tam lo a, season thum chhunga match 90 khela goal 23 a khung hnuah Mallorca lamah an kaltir leh ta. 

Aduriz-a'n Mallorca tan season hnih khelin match 78-ah goal 24 a khungsak a, season hnih a khelhah hian club tan league top scorer a ni ve ve - Bilbao inchhir nan erawh a la tawk zo lo a, Valencia lam an lo lang thung. 

Hetihlai hian Aduriz hi kum 29 mi a ni tawh a, footballer 'ṭha' tur tan ṭhat a hun tawh - mahse, Valencia-ah hian coach Unai Emery chuan hetihlaia ngaihven hlawh leh sawi hlawh Roberto Soldado a duh zawk a, dem theih a ni lo. 

Aduriz hian hmun chang tam lo tak chungin Valencia-a a season hmasa berah goal 14 a khung a, mahse Emery hian a ring ngang lo! Thlasik transfer-ah Soldado leh Aduriz a nei chungin Brazilian striker Jonas Gonçalves Oliveira a lei belh. 

Valencia tan season khat dang a khelh belh leh a, Emery-a'n striker pakhat a hman nasat avangin Aduriz tan chhuah chu thil fin thlak a ni - mahse kum 31 a ni tawh!

Bilbao-in Aduriz an khawngaih nge fan-te tih lawm an tum? A chhanna chu tun thlengin pek theih a ni lo - mahse kum thum chhung atan an striker hlui hi euro maktaduai 2.5-in an lalut. Athletic hian Aduriz awm loh laiin vawi thum cup semifinal an khel a, Europa League tiamin final vawi hnih an khel bawk. 

A nihna dik takah chuan Bilbao hian Aduriz an mamawhin a lang lo - fan-te ngainat rawn leh striker class Llorente an la kawl bawk. Mahse, Aduriz hian Bilbao-a kir lehna season hmasa berah Llorente a awm chungin match 44-ah goal 18 a khung a, lal thar a piang ta!

Season thar a her chhuak a, Llorente-a'n Juventus a pan a, Aduriz tan erawh vanneihna a ni - match 36-ah goal 18 a khung zui a, Bilbao fan-ten uain ṭha mi an hmu niah an inngai a, Zlatan Ibrahimovic-a'n, "Uain ṭha mi ang mai ka ni, ka upa telh telh a, ka ṭha telh telh a ni," a tih kha a dikna chu Aduriz a ni. 

Aduriz hian Bilbao-a pan ṭum thumnaah inelna hrang hrangah match 313 khelhsakin goal 149 a khung a, a season ṭha ber chu 2015-16 season khan hmangin inelna hrang hranga match 55-a khelhah goal 36 a khung. 

August 14 khan Spanish Super Cup first leg-ah Athletic Bilbao hian mak tak maiin Barcelona chu 4-0 in an sawp a, he inkhela  Aritz Aduriz-a hattrick chu Athletic Bilbao chanchina dai leh tawh ngai lo tur a ni. 

Bilbao hian minute 13-na lekah San José hmangin goal hmahruai an khung a, second half-a herchhuah hnuah Aduriz a inlar ṭan. Kum 34 mi striker hian minute 52-naa a ball hmuh chu a thiam dan ber hmangin a tauh lut a, San Mamés-a mipui 50,000 thawm chu ropui tak a ni!

Aduriz hian goal hnih dang khungin minute 15 chhung lekin hattrick a siam - second leg-ah Barcelona-in Lionel Messi hmangin goal hmahruai khung mah se Aduriz hi Nou Camp-ah pawh a inthlahrung duh lo. 

Bilbao si phurh sutna goal a khung leh a, inkhel pahnih belhkhawmah 5-1 a hnehna changin an champion - kum 31 hnua Bilbao-in nomawi lian tham an chawi leh hmasak ber a ni. 

August 16, 2019 khan Aduriz hian Barcelona nena an inkhelah 'bicycle kick' hmangin mawi zetin goal a khung leh a, 'goal ropui' huanga khung tlak a ni - a hunlaia he goal lawmtu te khan Spanish striker-in Bilbao tana a goal hnuhnung ber a khung tih erawh an hre kher lo ang. 

Aduriz hi season hmasa aṭang khan hliam vangin a talbuai reng a, goal khung a 'uar' tawk tawh lo - mahse Bilbao tana a goal hnuhnung ber erawh Barcelona laka goal mawi bik a ni a, La Liga-a season 15 chhung a zawna goal khung thei record Lionel Messi siam a nih rualna a ni bawk. 

"Ter Stegen-a mangchhia," tia an sawi Aduriz hi Barcelona goalkeeper Marc-André ter Stegen chuan, "Striker hmachhawn harsa tak tak an awm nual a, Aduriz erawh sawi lawk theih loh a ni," tiin Bilbao player hi a striker hmachhawn harsa tih ber a nih thu a sawi!

Aduriz hian kum 29 mi a nihin Spain tan a match hmasa ber a khel a, a match hnihna a khelh leh meuh chuan kum 35 mi a ni tawh - a match hnihnaah hian Italy a hmachhawn a, 1-1 a an inhnehtawkna inkhelah goal a khung nghal! 

UEFA Euro 2016-ah Spain tan inlan tura koh a ni a, November  12, 2016 khan  2018 World Cup qualifier-ah Macedonia hmachhawnin 4-0 in an chak a, kum 35 leh ni 275 mi nia goal khungin Spain tana goal khung upa ber record a siam. Spain tan match 13 khel hmanin goal hnih a khungsak. 

Aduriz hian Spain ram chhunga Basque Country tan match 13-ah goal 12 a khungsak a, UEFA leh FIFA hnuaiah Basque Country hi pawm an ni lo thung. 

- Spanish football writer lar Andy West 

- Barcelona keeper Ter Stegen

- Bilbao forward Iñaki Williams

- Athletic & Barca boss hlui Ernesto Valverde 

- Aduriz

Hming    Aritz Aduriz Zubeldia

Pianni leh thla    11 February 1981 (kum 39)

Pianna hmun    San Sebastián, Spain

San zawng    1.81 m (5 ft 11 in)

Playing position(s)    Striker

Athletic Bilbao

Supercopa de España: 2015

Copa del Rey runner-up: 2014–15

Zarra Trophy: 2014–15, 2015–16

UEFA Europa League Top Scorer: 2015–16, 2017–18 (joint) 

UEFA Europa League Squad of the Season: 2015–16

La Liga Player of the Month: March 2016, January 2018

•    March 2016-a La Liga Player of the Month-a thlan a nih khan kum 2013 aṭanga he award sem a nih hnuah Athletic player zinga dawng hmasa ber a ni. 

•    November 3, 2016 khan Europa League group stage match-ah  K.R.C. Genk chu 5-3 in an hneh a, Athletic goal hi a khung vek a ni a, Europa League match khata goal khung hnem ber a ni. 

•    Athletic (kum 38) leh Spain tana goal khung thei upa ber a ni. 

•    Eibar nen an inkhelh ṭuma a penalty hlawhchhuah ngei tura ngaih chu penalty a nih loh thu referee hnenah a hrilh. 

•    Tun season Copa del Rey final-ah Aduriz khelhna Athletic chu Real Sociedad nen inhmachhawn tur an ni a, a hun hmain Aduriz-a chawlh a ngai ta.