Serena leh Sharapova an chak nuamsa

World number 1 Serena Williams leh Maria Sharapova te chuan Nilaini khan Australian Open third round an lut a, player ṭha pahnih hian inelna neih mekah set an hloh lo.

Rod Laver Arena-a inkhelah champion lai Serena hian Hsieh Su-Wei chu darkar khat chhung lekin 6-1, 6-2 in a hneh. KUm 34-a upa Serena hian hnehna chang turin ace vawi sarih a siam a, unforced error vawi 16 lai a nei thung.

Australian Open vawi ruk cham-pion tawh Serena chuan, "Su-Wei khelh dan kha a dangdai khawp mai. Eng hunah pawh khan harsa tak takin ball a rawn vaw thut thei a, hmachhawn a harsa ṭhin hle. Melbourne-ah min ṭantu tam tak an awm a, anni ho hma a inkhelh hi nuam ka tiin ka match khelh apaingah theihtawp ka chhuah ṭhin," a ti.

World number 1 hlui Sharapova pawhin minute 71 chhungin harsatna a tawk lo. Seeded pawh chang phak lo Aliaksandra Sasnovich chu 6-2, 6-1 in a hneh a ni.

Kum 28-a upa Sharapova hian Sasnovich lakah hian vawi li ace a siam theih laiin double fault vawi thum a nei ve bawk a, a khelh ṭah ber ni a ni hran lo.

Russian Sharapova chuan, "Rod Laver Arena hi chu engtik lai pawhin hmun dang zawng aiin a nuam danglam bik. Khaw lum zawng kha 40 degrees Celcius chuang zet ni mah se harsatna nei loa ka khelh theih avangin ka lawm hle," a ti. Sharapova hian a match hmasa zawk chu Margaret Court-ah a khel a ni.

Kumin Australian Open-ah hian hmeichhe world number 2 Simona Halep leh seeded pasarihna Venus Williams bakah mipa world number 5 Rafael Nadal te chu an match hmasa berah an tlawm vek.

Grand Slam vawi sarih champion tawh Venus chu first round-a a tlak hnuah thuthar thehdarhtute a kawm duh loh avangin US dollar 5,000 (Rs 3,39,927.25) chawitir a ni. Nikum French Open first round-a a tlak ṭum khan hetiang tho hian a lo che tawh a, kha mi ṭum pawh khan International Tennis Federation chuan US dollar 3,0000 (Rs 2,03,970.00) an lo chawitir tawh bawk.