Ram hrang hranga World Cup khelh duh Infantino

FIFA presidential candidate Gianni Infantino chuan FIFA president-ah thlan tlin a nih chuan football khawvela ram inelna sang ber World Cup chu ram pakhat emaw ram pahnih chauhin an thlen ṭha a tih loh thu sawiin khawvel hmun hrang hranga khel tura ruahmanna an kalpui tur thu a sawi.

UEFA general secretary Infan-tino hian Sepp Blatter-a hmun ruak luah tura February 26-a FIFA president thlanna neih tur pualin a thil tumte January 20 khan puan chhuahna a nei a, World Cup chungchang a sawi hian ngaihven a hlawh fal hle a ni.

Europe khawmualpuia football thuneitu sang ber UEFA chuan Infantino a ruahmanna ang deuh hian Euro 2020 chu khawpui hrang hrang 13-a khelh turin an lo ruahman tawh a, semifinal leh final erawh Wembley Stadium, England-a khelh tura tih a ni thung.

Infantino hian FIFA president dinhmun luah tur hian Asian football confederation (AFC) president Sheikh Salman bin Ebrahim Al Khalifa, Prince Ali Bin Al Hussein, South Africa minister hlui Tokyo Sexwale leh FIFA deputy secretary general Jerome Champagne-te a khing dawn a ni.