Ashley Cole-a'n LA Galaxy a zawm

MLS club Los Angeles-in player ṭha an hip zel - season hmasa lawka Liverpool captain hlui Steven Gerrard an lakluh hnuah a hunlaia England defender ṭha ber pawl Ashley Cole chu AS Roma aṭangin an la lut leh ta. Cole hian Roma-a cham turin kum khat chhung contract la nei mah se inhriatthiam tawnna-in a thlawnin US club hi a zawm phalsak a ni.

Kum 2007 khan LA Galaxy hian football khawvel mak tih turin a hunlaia footballer hralh tla ber pawl David Beck-ham an lo la lut tawh a, tun dinhmunah Gerrard bak-ah Tottenham striker hlui Robbie Keane leh Bar-celona striker hlui Giovani dos Santos-te an kawl bawk a, Ashley Cole an lakluh leh tak bawk avangin US club hian ngaihven an hlawh sawt hle.

England tana vawi 107 inlan tawh Ashley Cole hian kum 2014 khan Chelsea chhuahsanin AS Roma a zawm a, mah se Italian club-ah hian beisei angin hmun a chang tam lo. Roma-a a cham chhung hian vawi 16 chauh inlan.

Arsenal-a a football career ṭantu Cole hian Gunners tana a khelh chhungin Premier League nomawi vawi hnih leh FA Cup nomawi vawi khat a chawi hman a, an hmelma hlun Chelsea a zawm hnuah Premier League nomawi pakhat bakah FA Cup nomawi pali, Europa League leh Champions League nomawi pakhat a chawi hman.

English left-back hian mimal chawimawina pawh a hui hnem hle a, England Player of the Year 2010-a thlan a nih bakah PFA Team of the Year 2003, 2004, 2005, 2011, UEFA Team of the Year 2004, 2010, UEFA Euro 2004 Team of the Tournament-ah te a lang phak a ni.