Nikum aiin ka khelh ṭhat a ṭul - Norde

I League champion Mohun Bagan-in an thiampuipa Sony Norde tel loin match hmasa pahnih-ah Aizawl FC leh Salgaocar an hneh a, Inrinni tlai dar 4:30 hian East Bengal an hmachhawn dawn. Kolkata derby-ah Haitian international Norde hi a inlan thei tawh ang.

Kum 26-a upa Norde chuan, "Mohun Bagan tan theihtawp ka chhuah dawn. Kan club hnenah hian min mamawh chhan leh min duh chhan hi ka lantir a ṭul a ni. Season liam ta aiin ka khelh ṭhat a ṭul a, Bagan hi nomawi chawi pui leh ka duh," tiin theihtawp a chhuah tur thu a sawi.

Thawhlehni khan Norde hian team practice a zawm ṭan a, 100% fitness a la nei lo. Bagan winger chuan, "Bagan inkhel ka lo thlir a, team ṭha tak an nih avangin ka tel lo pawhin an chak thei tih ka hria. Amaherawhchu East Bengal hmachhawn hunah hian tel ve ngei ka tum a, 100% fitness ka nei lo a nih pawhin minute tlem a zawng tal inlan ka duh," tiin inkhelh a châk tawh thu a sawi.

Indian Super League-ah Norde hi Mumbai City tan a inlan a, East Bengal lamin champion Chennaiyin FC defender thar Bernard Mendy an la lut. French defender chungchang sawiin Norde chuan, "Mendy hi a pawimawh ber a ni lo, player zawng zawng an
ṭha vek. Bagan khelh ṭhat ṭum a nih chuan East Bengal in tih theih an nei lo," tiin a sawi.

Mohun Bagan-ah India striker Jeje Lalpekhlua a awm a, East Bengal-ah S. Malsawmltuanga, Robert Lalthlamuana leh Lalrindika Ralte te an awm. Midfielder ṭha Didika hi ngalrek hliam vangin ISL Season 2-ah a inlan lo a, I League season chawhma lamah a inlan leh theih tawh beisei a ni.