Arsenal-ah Monreal a rinawm

Arsenal defender Nacho Monreal chuan a club-ah a rinawm zia lan tirin hun rei tak cham chhunzawm turin a contract a pawt sei a, Gunners lam chuan a contract rei zawng hi an tarlang lo thung.

Spain international hian kum 2013 khan La Liga club Malaga aṭangin Emirates Stadium a pan a, a tirah inkhel bul ṭan nghal zar zar lo mah se tunah erawh rinrawl ber a ni tawh.

Kum 29-a upa Monreal hi tun season-ah manager Arsene Wenger-a'n a chhawr rim hle a, league match 22 an khelh tawhah a la inlan kim vek. Goal venhim lamah a thawh hlawkin clean sheet vawi 10 an neih theih nana pawimawh ber pakhat a ni.

Tun season-ah Mon-real hian tackle vawi 51 nei tawhin pass vawi 1052 a nei tawh a, hmun him lama ball petchhuah (clearance) vawi 70 zet a nei tawh bawk a ni.

Gunners manager Wenger chuan, "Kan team-ah hian player naupang tak tak an la awm a, heng mite ho khawm tur hian senior player kan mamawh. Nacho hian club tan 100%-in a theihna a hlan a, hei hian kan lung a ti awi hle a ni," a ti.

Monreal chuan con-tract thar a ziah vanga a lawmthu sawiin, "Ka teammate te nen kan boruak a ṭhain kan manager nena kan inlaichinna pawh a ṭha hle. He hmun hi nuam ka tia a, a sang thei ang ber thlen pui ka tum a ni," a ti.