FA Cup Replay West Brom leh Villa an chak

Premier League club West Brom leh Aston Villa te'n Thawhlehni zan khan FA Cup replay-ah division hnuai lam club Bristol City leh Wycombe te hneh hramin fourth round an lut.

Baggies chak hram

Ashton Gate Stadium-ah championship club Bristol City-in Premier League club West Brom an mikhual a, club pahnih hi an intawn hmasak zawkin 2-2 in an inhnehtawk.

Baggies boss Tony Pulis-a'n kartawp Premier League-a Southampton hneh lo team
aṭangin player panga ngawt a thlak a, player koh let zingah West Brom player manto ber pound maktaduai 12 man Salomon Rondon pawh a tel.

Inkhel inhnehtawk takah Bristol City-in chance ṭha an hlah a, West Brom erawhin goal zawna an pet chhun chu goal-ah an chantir. Mikhual team tana goal khungtu hi Venezuelan forward Rondon a ni a, goal hi minute 52-naah a khung.

West Brom hian fourth round-ah League Two club Peterborough an mikhual dawn a, Bristol City ai chuan an nem deuh tura ngaih a ni.

West Brom manager Tony Pulis chuan, "A harsa dawn tih kan hria a, a harsa reng bawk. Kan phu ang ngeiin team ṭha zawk kan chakin ka hria," tiin a sawi.

City hmachhawn tur Villa

Aston Villa-in khualmualah League Two club Wycombe an draw a, Villa Park-ah e-rawh Premier League club-in dang-lamna an lantir.

Villa-in inkhel thunun chungin first half-ah goal an khung thei lo. Hun tawp hma minute 15-ah Villa defender Ciaran Clark chuan Ashley Westwood cross a tauh lut a, injury time-ah Idrissa Gueye-a'n khung belh lehin Villa 2-0 in an chak.

Villa-in awlsam takin fourth round an lut lo a, an mualah Man-chester City an mikhual dawn avangin fifth round kalkawng a khirh leh zual ngei ang.

Aston Villa manager Remi Garde chuan, "A pawimawh ber chu chak a ni. Wycombe kan hneh takah chuan beiseina kan leh ta a, he ka beiseina hi season tluanin tinung thei ila a duhawm hle," tiin a sawi.