Coppa Italia Inter Milan-in semifinal an lut

Thawhlehni zan khan Coppa Italia quarterfinal khelh a ni a, Inter Milan chuan 2-0 a Napoli hnehin semifinal an inhlangkai.

Stadio San Paolo-a inkhelah Inter tan Stevan Jovetic leh Adem Ljajic ten goal an khung a, Napoli forward Dries Mertens chu hun tawp dawnah hnawhchhuah a ni.

Napoli hian nikum khan Inter Milan hi Coppa Italia quarter final aṭangin an lo pet chhuak tawh a, kuminah erawh result letling chiahin a thleng. Inkhel boruak a san avangin hun tawp dawn hnaiah Inter manager Roberto Mancini chu Napoli bench a ṭhute nen an intihbuai avangin hnawhchhuah a ni bawk.

Napoli hi Serie A hmahruaitu ni lai an ni a, Europe lamah beisei an la neih bawk avangin Coppa Italia hi an ngaihthah deuhah a ngaih theih. Tun season league match vawi 20-a goal 20 khung thei striker Gonzalo Higuain chu bench-ah an ṭhut chawlhtir a, goal an phurh hnuah luhtir leh hnuhnawh mah se danglamna a thlen thei tawh bik lo.

Inter forward Stevan Jovetic chuan, "Kan inkhelh hnuhnung paliah vawi khat chiah hnehna kan chan theih hnua hnehna kan chang ve leh ta hi kan tan chuan a lawmawm hle. Kan zavai mai khan kan khel ṭhain ka hria, team
ṭha lakah hnehna kan chan avangin a lawmzawm zual bik," tiin a sawi.